خیبرپختونخوا : ٹریفک پولیس نے سردی توں بچاءلئی شہریاں نوں دستانے دینے شروع کر دِتے

خیبرپختونخوا : ٹریفک پولیس نے سردی توں بچاءلئی شہریاں نوں دستانے دینے شروع کر دِتے

پشاور(پاکستان پوائنٹ نیوز23۔دسمبر2016ء) خیبرپختونخوا دی ٹریفک پولیس وارڈنز دے ذریعے تبدیلی لیان دے بعد ہن شہریاں وچ سردی توں بچاءلئی آگاہی مہم وی شروع کر چکی اے۔ تفصیل دے مطابق خیبر پختونخوا دی ٹریفک پولیس نے سردی توں بچاءلئی احتیاطی تدبیراں دَسن دے نال نال موٹر سائیکل والیاں نوں دستانے تے ماسک وی دینے شروع کیتے نیں جہدے بعد شہری خاص کر موٹر سائیکل سواراں وچ خشی دی لہر دوڑ گئی اے۔

موٹر سائیکل سواراں نے خشگوار حیرت دا اظہار کردے ہوئے آکھیا کہ ٹریفک پولیس دے روکن اُتے سانوں لگدا اے کہ چالان ہو گیا اے پر اوہناں نے سانوں تحفہ دے دِتا۔ ٹریفک وارڈن افسر دے مطابق محکمے نے لوکائی وچ شعور پیدا کرن لئی کئی اقدامات کیتے نیں، جہدا مقصد موٹر سائیکل سواراں وچ سردی توں بچاءتے موسمی بیماریاں توں بچن لئی شعور پیدا کرنا اے۔ شہریاں نے ایس امید دا وکھالا کیتا اے کہ ٹریفک وارڈنز آن والے ویلے وچ وی شہریاں دا ایسے طرحاں خیال رکھن گے۔