اوگرا نوں وزارت پٹرولیم دے ماتحت کرن دا اقدام لاہور ہائی کورٹ وچ چیلنج

اوگرا نوں وزارت پٹرولیم دے ماتحت کرن دا اقدام لاہور ہائی کورٹ وچ چیلنج

لاہور(پاکستان پوائنٹ نیوز21۔دسمبر2016ء) اوگرا نوں وزارت پٹرولیم دے ماتحت کرن دا اقدام لاہور ہائی کورٹ وچ چیلنج کر دتا گیا۔ اوگرا نوں وزارت پٹرولیم دے ماتحت کرن خلاف درخاست تحریک انصاف دے شیراز ذکاءایڈووکیٹ نے لاہور ہائی کورٹ وچ دائر کیتی۔ درخاست وچ آکھیا گیا اے کہ اوگرا نوں وزارت پٹرولیم دے ماتحت کرن دی وفاقی کابینا تے سانجھے مفادات کونسل نے منظوری نہیں دِتی، اک نوٹی فکیشن دے ذریعے اتھارٹی نوں وزارت دے ماتحت نہیں کیتا جا سکدا۔

درخاست وچ ہور ایہ وی آکھیا گیا اے کہ حکومت آئل مارکیٹنگ کمپنیاں نوں نوازانا چاہندی اے، آئل مارکیٹنگ کمپنیاں وزارت دے ماتحت آن دے بعدتیل دی کمی پیدا کرن گیاں۔ درخاست وچ بنتی کیتی گئی اے کہ اوگرا نوں وزارت دے ماتحت کرن دا نوٹی فکیشن غیر آئینی قرار دِتا جائے۔