کابینہ وچ آکھاں گا کہ کوئٹہ کمیشن دی رپورٹ نوں پبلک کیتا جائے: چودھری نثار علی خان

آئی جی سندھ اے ڈی خواجا ایماندار بندا اے، اوہنوں جبری چھٹی اُتے گھلنا افسوسناک اے: اسلام آباد وچ پولیس دی پاسنگ آﺅٹ تقریب نال خطاب

کابینہ وچ آکھاں گا کہ کوئٹہ کمیشن دی رپورٹ نوں پبلک کیتا جائے: چودھری نثار علی خان
آئی جی سندھ اے ڈی خواجا ایماندار بندا اے، اوہنوں جبری چھٹی اُتے گھلنا افسوسناک اے: اسلام آباد وچ پولیس دی پاسنگ آﺅٹ تقریب نال خطاب

اسلام آباد(پاکستان پوائنٹ نیوز20۔دسمبر2016ء) اسلام آباد وچ پولیس دی پاسنگ آﺅٹ تقریب وچ وفاقی وزیر داخلا چودھری نثار علی خان نے وی رلت کیتی۔ پاسنگ آﺅٹ تقریب نال خطاب وچ وفاقی وزیر داخلا چودھری نثار علی خان نے آکھیا کہ پولیس وچ شامل ہون والے اہلکارپاکستان دا مان رکھن۔اوہناں دا کہنا سی کہ دہشت گردی خلاف جنگ دا پہلا دستہ اسلام آباد پولیس دا اے، پولیس وچ بھرتیاں میرٹ اُتے کیتیاں گئیاں نیں ۔

اوہناں دا کہنا سی کہ پہلے دھماکے ہوندے رہے پر حکومتاں سُتیاں رہیاں تے حکمران لوکائی نوں مِٹھیاں گولیاں دیندے رہے۔ اوہناں نے آکھیا کہ مینوں کرائم ریٹ زیرو چاہیدا، حرام وچ برکت تے سکون نہیں، نیک نیتی تے انصاف وچ سکون اے، اسلام آباد پولیس رینجرز توں سکھے۔ اوہناں نے ہدایت کیتی کہ پولیس نوں رینجرز دے جواناں تے افسراں نوں ویکھ کے اپنے حوصلے ودھانے چاہیدے۔

اوہناں دا کہنا سی کہ رینجرز نے اسلام آباد وچ پولیس نال رلکے شہر نوں پرسکون بنان وچ اہم کردار ادا کیتا اے، رینجرز اہلکار کم اُتے توجہ دیندے نیں میں کدی اوہناں کول موبائل فون یاں سگریٹ نہیں ویکھیا۔ چودھری نثار علی خان نے آکھیا کہ میں وزیر داخلا پاکستان آں تے میں اج تیکر کسے وی نائب قاصد دی بھرتی دی سفارش نہیں کیتی، حلف وچ آکھیا گیا کہ اپنے افسراں دا حکم مناں گا جدکہ حلف وچ ہونا چاہیدا کہ افسراں دا جائز کم مناں گا۔

چودھری نثار علی خان نے آکھیا کہ حکومتاں آﺅندیاں جاندیاں نیں۔ اوہناں نے آکھیا کہ جنرل (ر) راحیل شریف نوں آکھ کہ رپیڈ رسپانس فورس بنوائی گئی، پچھلے ڈیڈھ دو ورھیاں وچ ایف سی تے رینجرز اُتے 75ارب رُپئے خرچ کیتے، پولیس دی تربیت وی کمانڈوز وانگ کیتی گئی اے ۔ایس موقعے اُتے اپنے سیاسی مخالفاں نوں جواب دیندے ہوئے اوہناں نے آکھیا کہ اوہناں دا کیہ دباءہووے گا جہناں دے پلے کُجھ نہیں۔

وزیر داخلا نے آکھیا کہ میرے اُتے کوئی دباءنہیں، ہاں ضمیر دا دباءمیرے اُتے شاید ہووے۔چودھری نثار علی خان نے تقریب وچ خطاب دوران دسیا کہ قافلے دی خلاف ورزی اُتے تفتیش کیتی تے پتا چلیا کہ امریکی سفارتخانے دا قافلا اے۔ امریکی سفارتخانے نوں آکھیا گیا اے ، جے دوبارا انج ہویا تے کارروائی کیتی جائے گی۔ اوہناں نے آکھیا کہ ہفتہ زور لان دے بعد پارلیمنٹ دا سانجھا سیشن ہویا۔

اوہناں دا کہنا سی کہ کابینا وچ مطالبا کراں گا کہ ایبٹ آباد کمیشن دی رپورٹ پبلک کیتی جائے۔ چودھری نثارعلی خان نے پیپلز پارٹی نوں تنقید دا نشانا بناندے ہوئے آکھیا کہ آئے دن عجب کرپشن دی غضب کہانی دا ایہ جواب نہیں دےندے سن۔ کل سندھ وچ ایماندار آئی جی دا بُرا حال کیتا گیا۔ اوہناں نے آکھیا کہ آئی جی سندھ وفاق نوں آکھے بغیر جبری چھٹی اُتے چلا گیا، آئی جی سندھ اے ڈی خواجا بہت ایماندار بندا اے، اوہنوں جبری چھٹی اُتے گھلنا افسوسناک اے۔

اوہناں نے آکھیا کہ پیپلز پارٹی دا کرپشن مخالف مہم چلانا ایس طرحاں ای اے جویں بی جے پی مسلماناں دے حق لئی مہم چلائے۔ اوہناں نے سوال کیتا کہ کیہ پی پی پی نوں اپنے سارے کیسز بُھل گئے نیں؟کیہ ایہ بُھل گئے نیںکہ ایس پارٹی دے سربراہ نوں سوئس عدالت وچ سزا ہوئی؟ اوہناں نے آکھیا کہ بلاول بھٹو دی والدہ دا ناں وی پاناما لیکس وچ اے۔