حکومت دا قومی شناختی کارڈ بارے نواں اعلان

پہلی جنوری توں نارمل شناختی کارڈ بند کرن دا فیصلا

حکومت دا قومی شناختی کارڈ بارے نواں اعلان
پہلی جنوری توں نارمل شناختی کارڈ بند کرن دا فیصلا

اسلام آباد(پاکستان پوائنٹ نیوز15۔دسمبر2016ء) حکومت نے نارمل شناختی کارڈ بند کرکے نویں شناختی کارڈ بنان دا فیصلا کر لیا اے۔ تفصیل دے مطابق آن والے ورھے پہلی جنوری توں نیشنل ڈیٹا بیس اینڈ رجسٹریشن اتھارٹی (نادرا) نے سم والے شناختی کارڈ یعنی سمارٹ کارڈز جاری کرن دا اعلان کیتا اے جہدے تحت نارمل شناختی کارڈ یاں عام زبان وچ بغیر سم والے شناختی کارڈ نوں بند کر دِتا جائے گا۔

نجی ٹی وی چینل دے مطابق نادرا 31دسمبر دے بعد توں سم والے سمارٹ شناختی کارڈ جاری کرے گا جدکہ نادرا دے ایگزیکٹو سینٹرز نے 31دسمبر توں پہلے ای بغیر سم والے شناختی کارڈ بند کر دِتے نیں۔ دوجے پاسے وزیر داخلا دے حُکماں دے اُلٹ شہریاں نوں سمارٹ کارڈ400رُپئے دی بجائے 800رُپئے وچ جاری کیتا جائے گا۔پارلیمنٹ ہاﺅس وچ ارکان، ملازماں تے میڈیا توں تعلق رکھن والے بندیاں لئی نادرا دے ایگزیکٹو سینٹر اُتے نارمل فیس نال بغیر سم والے کمپوٹرائزڈ شناختی کارڈ نہیں بنائے جاندے۔

رپورٹ دے مطابق وفاقی دارلحکومت اسلام آباد وچ ایگزیکٹو سینٹر دے عملے دا کہنا اے کہ ذکر کیتے گئے سینٹر اُتے سم والے شناختی کارڈز 400رُپئے دی نارمل فیس دے بدلے بنائے جاندے سن۔ عملے نے دسیا کہ سینٹر وچ سم والے کارڈز بنائے جاندے سن پر ہن اوہناں نوں جاری کرنا وی بند کر دِتا گیا اے۔ عملے دا کہنا سی کہ ایہ اک ایگزیکٹو سینٹر اے ایس لئی ایتھوں ہن 800رُپئے دی دوگنا فیس دے بدلے ای کارڈز جاری کیتا جائے گا۔

عملے دے مطابق چالو ورھے 31دسمبر دے بعد نادرا دے کسے وی سینٹر توں بغیر سم والے کارڈ جاری نہیں کیتے جان گے تے ایس پالیسی دا اعلان جلدی ای کر دِتا جائے گا۔ ایگزیکٹو سینٹر دے عملے نے ہور دسیا کہ پارلیمنٹ دی بلڈنگ وچ موجود نادرا دفتر نے بغیر سم والے یاں نارمل شناختی کارڈ جاری کرنا پہلے ای بند کر دِتے نیں۔ عملے دا کہنا اے کہ ایس سینٹر دی آمدن بہت گھٹ اے ایس لئی ایس سینٹر توں صرف سم والے سمارٹ کارڈ جاری کیتے جاندے نیں جہناں دی فیس وی دوگنا ہوندی اے جدکہ سمارٹ کارڈ جاری کرن دا مقصد ایس سینٹر دے خرچے پورے کرنا وی اے۔