جنید جمشید دی نماز جنازہ نور خان ائر بیس اُتے پڑھی گئی

جنید جمشید دی نماز جنازہ نور خان ائر بیس اُتے پڑھی گئی

اسلام آباد(پاکستان پوائنٹ نیوز14۔دسمبر2016ء) مشہور نعت خواں جنید جمشید دی نماز جنازہ نور خان ائر بیس اُتے ہو گئی اے، جنید جمشید دے جُسے نوں قومی جھنڈے وچ ولھیٹیا گیا اے۔ تفصیل دے مطابق مشہور نعت خواں جنید جمشید دی نماز جنازہ نور خان ائر بیس اُتے ہو گئی اے جدکہ جنید جمشید دے جُسے نوں قومی جھنڈے وچ ولھیٹیا گیا سی ۔ نماز جنازہ وچ پاک فضائیا دے سربراہ ائر مارشل سہیل امان، مولانا طارق جمیل سنے مذہبی، سیاسی تے سماجی شخصیتاں نے رلت کیتی۔

نور خان ائر بیس اُتے جنید جمشید نوں گارڈ آف آنر وی پیش کیتا گیا۔ترجمان پاک فضائیا دے مطابق مشہور نعت خواں جنید جمشید دی میت کراچی روانا کرن توں پہلے مرحوم دی نماز جنازہ نور خان ائر بیس اُتے پڑھی گئی اے۔ ترجمان دے مطابق جنید جمشید دے والد جمشید اکبر پاک فضائیا دے وارویٹرن سن، مرحوم جمشید اکبر نے ائر فورس دے نال نال پاکستان نیوی وچ وی خدمتاں انجام دِتیاں۔

ائر فورس آفیسر دا پُتر ہون پاروں جنید جمشید ہمیشہ ائر فورس نال جُڑے رہے۔ جنید جمشید نے فضائیا سکول توں تعلیم حاصل کیتی تے بہترین پڑھیار رہے۔ ترجمان نے ہور دسیا کہ جنید جمشید دی نماز جنازہ چکلالہ دے نور خان ائر بیس اُتے پڑھی گئی اے۔ نماز جنازہ وچ ائر چیف مارشل سہیل امان نے وی رلت کیتی۔ نماز جنازہ پڑھن دے بعد میت نوں سی ون تھرٹی دے ذریعے کراچی پہنچایا جا رہیا اے۔