لاہور(پاکستان پوائنٹ نیوز14۔دسمبر2016ء) لاہور ہائی کورٹ نے کرپشن دی بنیاد اُتے وزیر اعظم میاں نواز شریف تے اوہناں دے بھرا وزیر اعلا پنجاب شہباز شریف بارے دائر نااہلی دی درخاست نہ سنوائی جوگ قرار دیندے ہوئے رَد کر دِتی۔ تفصیل دے مطابق لاہور ہائی کورٹ دے جسٹس شمس محمود مرزا نے مقامی شہری فیصل نصیر دی درخاست اُتے فیصلا سُنایا۔ درخاست گزار نے الزام لایا سی کہ نواز شریف تے شہباز شریف کرپشن کر رہے نیں، ایس توں علاوا وفاق تے پنجاب دے ہرمحکمے وچ من پسند بندیاں نوں لایا جا رہیا اے۔
درخاست گزار دا ہور کہنا سی کہ دوویں بھرا آئین دے آرٹیکل 62، 63اُتے پورا نہیں اُتردے ایس لئی عدالت توں درخاست اے کہ اوہناں نوں نااہل قرار دیوے۔عدالت نے درخاست دے سنوائی جوگ ہون دے بعد فیصلا محفوظ کر لیا سی جدکہ بدھ دے دیہاڑے فیصلا سُناندے ہوئے عدالت نے درخاست نہ سنوائی جوگ قرار دے کے رَد کر دِتی۔
