اسلام آباد(پاکستان پوائنٹ نیوز08۔دسمبر2016ء) پی ٹی آئی چیئرمین عمران خان نے میڈیا نال گل بات کردے ہوئے کمیشن بارے اپنا فیصلا سُنا دِتا،عمران خان نے کمیشن بنان دی تجویز نوں رَد کر دِتا۔ تفصیل دے مطابق میڈیا نال گل بات کردے ہوئے اوہناں دا کہنا سی کہ پچھلے دیہاڑے سپریم کورٹ نے پاناما لیکس وچ کمیشن بنان دی تجویز دِتی سی تے ایس بارے ساڈے کولوں جواب وی منگیا سی۔
اوہناں دا کہنا سی کہ اسیں پارٹی عہدیداراں تے قانونی ٹیم نال مشورے دے بعد فیصلا کیتا اے کہ اسیں پاناما کیس وچ کمیشن نہیں بنانا چاہندے۔ اوہناں نے آکھیا کہ پاناما کیس دے معاملے اُتے اسیں کمیشن بنان دی آپشن نوں رَد کردے آں، اسیں چاہندے آں کہ سپریم کورٹ دا 5رکنی بنچ ای کیس دا فیصلا کرے۔ عمران خان نے آکھیا کہ اسیں چاہندے آں کہ پاناما لیکس دی سنوائی روزانا دی بنیاد اُتے کیتی جائے۔
عمران خان نے آکھیا کہ اسیں پچھلے دیہاڑے عدالت وچ ایہ کیس جِت گئے آں، قوم 8مہینیاں توں پاناما دا ہنگاما سُن رہی اے، ہُن ویلا آ گیا اے کہ ایس کیس دا فیصلا سُنا دِتا جائے۔ عمران خان نے ہور آکھیا کہ کمیشن اک ای شرط اُتے بن سکدا اے جے نواز شریف استعفی دے دین۔ اوہناں دا کہنا سی کہ عدالت وچ جان دا مطلب ای ایہو سی کہ عدالت دا فیصلا قبول ہووے گا۔ اوہناں دا کہنا سی کہ جو وی فیصلا آیا اوہنوں قبول کراں گے۔
