بلیک باکس کیہ ہوندا اے، تے ایہ کس کم آﺅندا اے؟
اسلام آباد(پاکستان پوائنٹ نیوز08۔دسمبر2016ئ) جہاز وچ موجود بلیک باکس کیہ ہوندا اے تے ایہ کس کم آﺅندا اے؟ ایس اُچیچی رپورٹ وچ تہانوں پتا چلے گا۔ بلیک باکس اصل وچ اک اجیہا باکس ہوندا اے جہدے وچ اُڈان دوران اہم تکنیکی معلومات تے کاک پٹ وچ ہون والی ساری گل بات دا ریکارڈ موجود ہوند ااے۔ اصل وچ بلیک باکس اک ریکارڈنگ والا آلہ ہوندا اے۔
جہنوں جہاز وچ رکھن دا مقصد کسے وی حادثے یاں واقعے دی صورت وچ تحقیقات وچ ورتنا ہوند ااے۔ بلیک باکس نوں جہاز حادثے دیاں تحقیقات دے دوران خاصی اہمیت حاصل ہوندی اے۔ بلیک باکس نوں جہاز دے پچھلے حصے یعنی ٹیل وچ رکھیا جاندا اے، اوتھے رکھن دی وجہ اےہ اے کہ کسے وی حادثے دی صورت وچ جہاز دا اگلا حصہ پہلے زمین یاں پہاڑ سنے کسے وی سطح نال ٹکراندا اے۔
جے کوئی جہاز سمندری حد وچ حادثے دا شکار ہو جائے تے انج دی صورتحال وچ بلیک باکس دے اندر اک ڈیوائس رکھی جاندی اے جہنوں یو ایل بی یعنی انڈر واٹر لوکیٹر بیگن آکھیا جاندا اے، جویں ای ایہ ڈیوائس سمندر دی سطح نال ٹکراندی اے تے ایہ اپنے آپ ای آن ہو جاندی اے۔ ایس ڈیوائس دی خاص گل ایہ اے کہ ایہ ڈیوائس 14ہزار فٹ ڈونگھیائی توں وی سگنل دین دی بھرپور صلاحیت رکھدی اے۔
