اسلام آباد(پاکستان پوائنٹ نیوز06۔دسمبر2016ء) عمران خان دا کہنا سی کہ نعیم بخاری تے اوہناں دی ٹیم نوں مبارکباد دینا واں۔ عدالت وچ نواز شریف دے وکیلاں نوں بہت سارے سوالاں دے جواب دینے پین گے، سنوائی وچ واضح ہو گیا اے کہ تحریک انصاف دے وکیلاں نے پوری تیاری کیتی ہوئی سی۔ تفصیل دے مطابق میڈیا نال گل بات کردے ہوئے عمران خان نے آکھیا کہ پی ٹی آئی نے ثابت کیتا کہ وزیراعظم نے قوم تے قومی اسمبلی نال خطاب وچ جھوٹھ بولیا، ججاں نے آکھیاکہ نواز شریف دے بالاں نے فلیٹ دی ملکیت مَنی۔
اوہناں نے آکھیا کہ (ن) لیگ نے کاغذات توں ثابت کیتا کہ اوہناں نوں نقصان دا ساہمنا کرنا پیا سی، وزیر اعظم نے آپ آکھیا کہ اوہناں دے کول سارے کاغذات نیں۔ عمران خان نے آکھیا کہ گلف سٹیل نقصان وچ سی تے ایہناں کول پیسے کتھوں آئے؟ قطری خط کہندا اے کہ دبئی توں پیسہ قطر تے فیر لندن گیا، وزیر اعظم نے آکھیا کہ جدہ وچ سٹیل مل ویچی تے لندن وچ اوہناں دے بالاں نے کاروبار شروع کیتا۔
اوہناں نے آکھیا کہ حسن نواز 1999وچ اک پڑھیار سی تے 2001وچ اوہ ارب پتی بن گیا۔ عمران خان دا کہنا سی کہ ن لیگ دا کم نواز شریف دی کرپشن بچانا اے۔ نواز شریف نے کاغذات تے دستاویزات بارے وی جھوٹھ بولیا پر ہُن ثابت ہو گیا اے کہ اوہناں کول کاغذات موجود نہیں۔ عمران نے آکھیا کہ حسین نواز نے پنج ورھیاں وچ 74کروڑ رُپئے نواز شریف نوں گھلے تے اوہدے اُتے ٹیکس نہیں دِتا، ساڈے خیال وچ 74کروڑ رُپئے منی لانڈرنگ دے ذریعے گھلے گئے۔
عمران نے آکھیا کہ جدہ سٹیل مل ویچ کے نواز شریف دے بالاں نے لندن وچ جائیداداں مُل لئیاں، پیسہ جے جدہ توں لندن گیا تے فیر قطری شہزادے دا خط کیہ اے؟ مے فیئر فلیٹس بارے آکھیا گیا کہ گلف سٹیل مل ویچ کے لئے لئے، تے گلف سٹیل مل بارے آکھیا گیا کہ اوہ کسارے وچ سی۔ 34ملین کتھوں آئے؟۔ عمران خان نے آکھیا کہ شریف خاندان دے فلیٹس دے ڈائریکٹرز وچ سارے شریف خاندان دے بندے سن، صرف نواز شریف دا ناں کڈھا دِتا گیا کیوں جے اوہناں نے وزیر اعظم بننا سی۔
عمران خان نے آکھیا کہ مریم نواز کفالت ہیٹھ سی یاں نہیں، ہُن ویکھدے آں کہ اوہناں دا جواب کیہ آﺅندااے؟ عمران خان نے آکھیا کہ کیس وچ پہلے ای دیر ہو گئی اے ہُن کیس دا فیصلا ہو جانا چاہیدا۔ اوہناں دا کہنا سی کہ جے پارلیمنٹ وچ ٹی او آرز بن جاندے تے ایہ کیس عدالت وچ لیان دی نوبت ای نہ آﺅندی۔ عمران خان دا کہنا سی کہ پاناما معاملے اُتے سبھ توں زیادا کوشش تحریک انصاف نے کیتی اے، تحریک انصاف دے ’جنونی‘ نہ نکلدے تے پاناما ایشو ختم ہو جانا سی۔
اوہناں نے آکھیا کہ میری درخاست اے کہ ایس کیس وچ ایہو بنچ فیصلا کرے۔ عمران خان دا کہنا سی کہ نواز شریف اپنے آپ نوں بچان لئی کِدھرے ڈونلڈ ٹرمپ نوں نہ بُلا لین۔ عمران خان نے آکھیا کہ اسیں شریف خاندان نوں ایہ آکھن دا جوازنہیں دینا چاہندے کہ ترقی رُک رہی اے۔
