اسلام آباد(پاکستان پوائنٹ نیوز03۔دسمبر2016ء) پی ٹی آئی رہنما جہانگیر خان ترین نے وزیر اعلا پنجاب میاں شہباز شریف خلاف لاہور ہائی کورٹ وچ نااہلی درخاست دین دا اعلان کر دِتا۔ تفصیل دے مطابق میڈیا نال گل بات کردے ہوئے جہانگیر ترین نے آکھیا کہ آن والے ہفتے لاہور ہائی کورٹ وچ وزیر اعلا پنجاب میاں محمد شہباز شریف دی نااہلی لئی رٹ دائر کراں گے۔
اوہناں نے آکھیا کہ ایس کیس وچ بابر اعوان ساڈے وکیل ہون گے تے ایہ اوہی شہباز شریف نیں جو آکھدے سن کہ چھ مہینیاں وچ لوڈ شیڈنگ ختم کر دیاں گا، جہانگیر ترین نے آکھیا کہ پاناما لیکس کیس وچ سپریم کورٹ وچ ثبوت جمع کروا دِتے نیں۔ اوہناں نے آکھیا کہ بہت مشکل اے کہ نواز شریف نوں کلین چٹ ملے۔ پی ٹی آئی رہنما دا کہنا سی کہ جدوں تیک اسیں اداریاں نوں مضبوط نہیں کراں گے ساڈا ملک ترقی نہیں کر ےگا۔
اوہناں نے آکھیا کہ اسیں حکومت ڈِگان پِچھے نہیں بلکہ کرپٹ نظام خلاف آں، شریف خاندان نے 2001وچ کاروبار شروع کیتا، نواز شریف دی دبئی فیکٹری تے کسارے وچ سی فیر پیسہ کتھوں آیا؟ پیسہ آن دے دلائل نہیں نیں ایس لئی ایہ کرپشن دا پیسہ اے۔ اوہناں نے عدالت وچ کئی دستاویزات جمع نہیں کروائیاں، جو وی جمع کرواندے نیں اوہ پھڑے جاندے نیں۔ اوہناںد ا کہنا سی کہ پاناما کیس وچ بابر اعوان نال مشورا کیتا اے، کیس نوں لیڈ نعیم بخاری کرن گے۔
جہانگیر ترین نے آکھیا کہ نواز شریف دی پوری فیملی کرپٹ تے جھوٹھی اے، جو جائیداداں ساہمنے آئیاں نیں ایہ اوہناں دی کل جائیداد دا کُجھ حصہ اے جہدے وچوں ہور شیواں نکل رہیاں نیں۔ اوہناں نے آکھیا کہ مینوں یقین اے کہ شریف خاندان دی باہرلے ملک جائیداد بارے اجے ہور شیواں وی نکلن گیاں، جیویں جیویں معاملا اگانہ ودھے گا تے کرپشن وی ساہمنے آ ئے گی۔
اوہناں دا کہنا سی کہ شریف فیملی نے اقتدار وچ آ کے ہمیشہ ملک نوں لُٹیا اے، میری دعا اے کہ احتساب دا ویلا جلدی آئے۔ پیپلز پارٹی دی پنجاب وچ واپسی بارے سوال دے جواب وچ پی ٹی آئی رہنما نے آکھیا کہ 3دن یوم تاسیں منان نال پیپلز پارٹی پنجاب وچ واپس نہیں آ سکدی۔ اوہناں دا کہنا سی کہ آن والے الیکشن وچ مقابلا پی ٹی آئی تے ن لیگ وچکار ہووے گا۔
