اسلام آباد(پاکستان پوائنٹ نیوز03۔دسمبر2016ء) پاناما لیکس وچ شریف خاندان دیاں دو آف شور کمپنیاں نیسکول تے نیلسن انٹرپرائزر لمیٹڈ دا انکشاف پہلے ہو چکیا اے پر ہن شریف خاندان دی ملکیت اک ہور کمپنی دا انکشاف ہویا اے۔ تفصیل دے مطابق کمپنی دا ناں کوبر گروپ اے، ایس کمپنی دا ناں اودوں ساہمنے آیا اے جدوں شریف خاندان خلاف سپریم کورٹ وچ پاناما کیس سنوائی ہیٹھ اے تے شریف خاندان عدالت اندر لندن وچ خریدی گئی جائیداد دی منی ٹریل دین دی کوشش کر رہیا اے۔
پاناما گیٹ کیس وچ سپریم کورٹ وچ جمع کروائیاں گئیاں دستاویزات دے مطابق مریم صفدر اپنے بھرا دی کمپنی دی ٹرسٹی نیں، دستاویزات وچ ایہ وی دسیا گیا اے کہ لندن وچ خریدے گئے فلیٹس قطری شہزدادے ولوں دِتے گئے جو پیسیاں نال مُل لِتے گئے سن، فروری 2006وچ مریم نواز نے اپنے بھرا حسین نواز دیاں دو آف شور کمپنیاں نیلسن تے نیسکول لئی بطور ٹرسٹی دستخط کیتے سن جدکہ اوسے دن اوہناں نے اک ہور کمپنی کوبر گروپ، جہدے وچ اوہناں دے بھرا دے 49فیصد شیئر سن لئی وی اقرار نامے اُتے بطور ٹرسٹی دستخظ کیتے سن۔
سپریم کورٹ وچ پاناما کیس دی آئندا سنوائی 6دسمبر نوں اے جدکہ تیجی آف شور کمپنی ساہمنے آن دے بعد پاکستان تحریک انصاف دی لیگل ٹیم نے ایس بارے غور شروع کر دِتا۔ پاناما کیس دیاں دو ہفتیاں دی سنوائی دے دوران پی ٹی آئی نے اپنے کیس نوں ہور مضبوط بنان لئی دس توں ودھ سوال کھڑے کر دِتے نیں۔ پی ٹی آئی دے وکیل نعیم بخاری ولوں دِتے گئے دلائل اُتے مبینا رضا مندی دا وکھالا کردے ہوئے کجھ ججاں نے ایس گل اُتے اتفاق کیتا اے کہ شریف خاندان نے کُجھ دستاویزات دی موجودگی سنے آف شور کمپنیاں دی ملکیت بارے کئی حقائق لُکان دی کوشش کیتی اے۔
عدالت نے شریف خاندان ولوں منی ٹریل دیاں دستاویزات نوں وی ادھورا قرار دیندے ہوئے سوال کھڑے کر دِتے نیں۔ عدالت دے مطابق بنکاں دیاں تفصیلاں جو قطر توں دبئی تے دبئی توں لندن پیسے دی منتقلی نوں ظاہر کر سکن، غائب نیں۔ یاد رہوے کہ پاناما کیس دی سنوائی چھ دسمبر نوں ہووے گی جہدے وچ پی ٹی آئی دے وکیلاں ولوں شریف خاندان دی تیجی آف شور کمپنی بارے وی سوال کیتے جان گے۔
