لاہور(پاکستان پوائنٹ نیوز02۔دسمبر2016ء) پیپلز پارٹی دے چیئرمین بلاول بھٹو زرداری نے آکھیا اے کہ نیشنل ایکشن پلان نہیں بلکہ (ن) لیگ دا پلان ناکام ہوگیا اے، چودھری نثار ناکام ہو گئے نیں، 27دسمبر نوں مطالبے نہ مَنے گئے تے گو نواز گود ے نعرے لگن گے۔ تفصیل دے مطابق اج بلاول ہاﺅس لاہور وچ پیپلز پارٹی دے یوم تاسیں دی تقریب نال خطاب کردے ہوئے بلاول بھٹو زرداری دا کہنا سی کہ محترمہ بے نظیر بھٹو نے دہشت گرداں خلاف لڑدے جان دِتی۔
اوہناں نے آکھیا کہ تخت لاہور ڈردا اے کہ میں میر مرتضی بھٹو دا بھنیوا وی آں، شہید بے نظیر بھٹو، ذوالفقار علی بھٹوتے میر مرتضی بھٹو اج وی زندا نیں۔ اوہناں نے آکھیا کہ سانوں انصاف تے مساوات چاہیدا، میں وی میٹرو چاہنا واں پر لوکائی نوں پہلے کپڑا، مکان، تعلیم تے صحت دیو۔ اوہناں نے آکھیا کہ چودھری نثار ناکام ہو گئے نیں۔ نیشنل ایکشن پلان نہیں بلکہ (ن) لیگ دا پلان ناکام ہویا۔
اوہناں دا کہنا سی کہ نیشنل ایکشن پلان دی حالت لوکائی ساہمنے اے۔ ایس موقعے اُتے بلاول نے گو نثار گو دے نعرے لواندے ہوئے آکھیا کہ چودھری نثار بولن لئی تیار نہیں نیں، بلوچستان ، سندھ، پنجاب، کراچی،خیبر پختونخوا، سوات، نارتھ وزیرستا ن توں نعرا نہیں لگ رہیا بلکہ گو نثار گو دا نعرا لاہوروں لگ رہیا اے۔ اوہناں نے آکھیا کہ پاناما سکینڈل اُتے اپوزیشن نے اپنا بل لیان دا مطالبا کیتا سی، میاں صاحب نے ساڈا مطالبا وی نہیں منیا۔ اوہناں نے خبردار کیتا کہ جے حکومت نے ساڈے چار مطالبے نہ منے تے 27دسمبر نوں گو نواز گو دے نعرے لگن گے۔
