اسلام آباد(پاکستان پوائنٹ نیوز30۔نومبر۔2016ء) پی ٹی آئی چیئرمین عمران خان نے آکھیا کہ میں اج دی سنوائی دے بعد تحریک انصاف دے لوکاں نوں مبارکباد دیناواں، اوہناں نے آکھیا کہ شریف خاندان دیاں پچھلے 7مہینیاں توں کہانیاں بدل رہیاں نیں۔ اوہناں نے آکھیا کہ عدالت وچ پاناما لیکس دی سنوائی چل رہی اے پر کیس ختم ہو گیا اے۔ اوہناں دا کہنا سی کہ مریم نواز نے 2012وچ آکھیا کہ اوہدی تے اوہناں دے خاندان دی باہرلے ملک کوئی جائیداد نہیں اے پر جدوں دا بیرون ملک جائیداد دا انکشاف ہویا اے تے کہانی بدلدی جا رہی اے۔
عمران خان نے آکھیا کہ فیکٹریاں تے بیرون ملک جائیداد بارے دو کہانیاں نیں۔ قطری حاتم طائی توں پیسے لین دی کہانی ہور اے، قطری شہزادے دا تے نہ سِر نہ پیر اے۔ اوہناں دا کہنا سی کہ عدالت وچ قطری شہزادے دے خط دیاں دھجیاں اُڈائیاں گئیاں نیں۔ اوہناں نے آکھیا کہ شریف خاندان دیاں کمپنیاں ایس لئی لُکائیاں گئیاں سن کیوں جے اوہناں دے پِچھے ارباں رُپئے لُکے سن۔
عمران خان نے آکھیا کہ پاناما دا انکشاف نہ ہوندا تے کدوی وی بیرون ملک پئی جائیداد نہ مَنی جاندی۔ اوہناںد ا کہنا سی کہ میں اج تحریک انصاف دے لوکاں نوں مبارکباد دینا واں، اوہناں نے آکھیا کہ وزیر اعظم نے ایوان وچ آکھیا کہ منی ٹریل موجود اے، جدوں پیسہ ای نہیں سی تے منی ٹریل کتھے آئے سن؟، ن لیگ دے وہم و گمان وچ وی نہیں سی کہ معاملا عدالت جائے گا۔
اوہناں دا کہنا سی کہ اج اک ہور کمال ہویا اے کہ نواں ٹرسٹ چھال مار کے آ گیا اے۔ اوہناں نے آکھیا کہ عدالت وچ ہُن نویاں نویاں کہانیاں ساہمنے آ رہیاں نیں، عدالت وچ جمع کروائیاں گئیاں دستاویزات دے مطابق اوہناں نوں دبئی سٹیل مل وچ نقصان ہویا سی، دستاویزات دے مطابق دبئی سٹیل مل وچ 2.6ملین دا نقصان ہویا پر ایس سارے معاملے اُتے شریف خاندان دے بیاناں وچ فرق اے۔
اوہناں نے آکھیا کہ (ن) لیگ نے موقف اختیار کیتا سی کہ جدہ دی سٹیل مل ویچ کے بالاں نے کاروبار شروع کیتا، جدوں اوہناں دے پُتر نے کاروبار شروع کیتا تے اوہدی 25سال سی، اینی عمر وچ اینا پیسہ کتھوں آیا؟ ارباں رُپئے دے کاروبار لئی کتھوں پیسے آئے؟ کیہ جہڑے پیسیاں نال جائیداد خریدی اوہ نواز شریف دے سن۔ عمران خان نے ہور آکھیا کہ چیئرمین نیب نے ایس حوالے نال کارروائی نہیں کیتی، ساڈے وکیل نے چیئرمین نیب خلاف کریمنل پروسیڈنگ شروع کرن دا مطالبا کیتا اے۔
