جہانیاں(پاکستان پوائنٹ نیوز30۔نومبر۔2016ء) پاکستان سنے دنیا بھر وچ دسمبر دا مہینہ بہت اہمیت جوگ سمجھیا جاندا اے، ایس مہینے ملکی تے بین الاقوامی سطح اُتے بہت سارے اہم واقعات ہوئے نیں۔ تفصیل دے مطابق دسمبر دے مہینے وچ بھارت وچ مسلماناں دی عظیم یادگار بابری مسجد نوں شہید کیتا گیا جہدی وجہ توں دنیا بھر دے مسلماناں وچ غصہ دی لہر دوڑ گئی، دسمبر دی 16تاریخ پاکستانیاں نوں افسردا کر دیندی اے، دسمبر دے مہینے وچ پاکستان دے شہر پشاور دے آرمی پبلک سکول اُتے دہشت گرداں دے حملیاں وچ بالاں تے اُستاداں سنے ڈیڈھ سو دے لگ بھگ بندے شہید ہوئے جدکہ ایس واقعے نے کروڑاں دِلاں نوںاُداس کر دِتا، سقوط ڈھاکا وی دسمبر دے مہینے دی 16تاریخ نوں ہویا جہدے نتیجے وچ مشرقی پاکستان ساڈے توں وکھ ہوگیا، ایس دُکھانت نے کروڑاں محبت وطن پاکستانیاں نوں رُوا کے رکھ دِتا سی۔
امریکا نے افغانستان اُتے فضائی حملے وی ایسے مہینے شروع کیتے، عراق دے سابق صدر صدام حسین نوں وی ایسے مہینے پھاہے لایا گیا۔ دسمبر 1984 وچ بھارت دے علاقے وچ بھوچال فیکٹری توں زہریلی گیس دے لیک ہون پاروں 20ہزار لوک ہلاک تے لکھاں متاثر ہوئے جدکہ دسمبر 1979وچ روس نے افغانستان اُتے حملا کیتا، 26دسمبر 2004وچ 14ملکاں وچ سونامی آیا جہدی وجہ توں لکھاں لوک ایس دنیا توں چلے گئے۔
دسمبر دے مہینے وچ پاکستان دی سابق وزیر اعظم بے نظیر بھٹو پہلی وزیر اعظم بنیاں جدکہ اوہناں نوں دسمبر دے مہینے وچ ای راولپنڈی وچ شہید کر دِتا گیا، پاکستان دے صدر فاروق لغاری تے چیف جسٹس سجاد علی شاہ ایسے مہینے وچ ای اپنے عہدیاں توں مستعفی ہو گئے سن، بانی پاکستان قائد اعظم محمد علی جناح تے موجوودا وزیر اعظم میاں محمد نواز شریف دا جنم دیہاڑ وی ایسے مہینے اے جدکہ ایسے مہینے ای نواز شریف نوں دیسو پردیس کیتا گیا۔
دنیا بھر دی مسیحی برادری اپنا سبھ توں وڈا تہوار کرسمس وی ایسے مہینے مناندی اے، ایڈز تے معذور اں دا قومانتری دیہاڑ وی دسمبر وچ منایا جاندا اے جدکہ پاکستان وچ جنرل پرویز مشرف دے دور حکومت وچ نافذکیتی گئی ایمرجنسی دا خاتما وی ایسے مہینے ہویا سی، مشہور شاعر جوش ملیح آبادی، راحت فتح علی خان، جماعت اسلامی دے رہنما لیاقت بلوچ دا جنم دیہاڑ جدکہ افریقی صدر نیلسن منڈیلا، مشہور قول عزیز میاں، پنجابی شاعر اُستاد دامن، ملکہ ترنم نور جہاں، حسین شہید سہروردی، فارسی شاعر عمر خیام، پروین شاکر، کمال احمد رضوی تے پطرس بخاری وی ایس دنیا توں دسمبر دے مہینے وچ ای گئے۔
ایس توں وکھ جنوبی پنجاب دے شہر ملتان وچ حساس ادارے دے دفتر دے باہر بم دھماکاوی دسمبر وچ ہویا۔ سابق چیف جسٹس افتخار محمد چودھری، سابق وزیر داخلا رحمان ملک، مشہور پاکستانی شاعر جون ایلیا، بھارتی اداکار دلیپ کمار، راج کپور، سونیا گاندھی دا پیدائش دیہاڑ وی دسمبر وچ ای اے۔ دسمبر 1893وچ چین دے انقلابی رہنما ماﺅزے تنگ پیدا ہوئے، دسمبر وچ ای غلام اسحاق خان صدر چُنے گئے۔
مشہور شاعر مظفر وارثی دا پیدائش دیہاڑ جدکہ سابق صدر پرویز مشرف اُتے قاتلانا حملا وی دسمبر وچ ای ہویا۔ مشہور کرکٹرز سرفراز نواز، دانش کنیریا تے عمران نذیر دی سالگرھا ایسے مہینے اے جدکہ آل انڈیا مسلم لیگ تے پاکستان پیپلز پارٹی دا قیام وی ایسے مہینے عمل وچ آیا ایس توں وکھ دسمبر 1984نوں ملک وچ ریفرنڈم وی ایسے مہینے ہویا۔
