اسلام آباد(پاکستان پوائنٹ نیوز28۔نومبر۔2016ء) الیکشن کمیشن نے وزیر اعظم نواز شریف تے پی ٹی آئی چیئرمین عمران خان خلاف نااہلی دیاں درخاستاں خارج کردِتیاں نیں۔ تفصیل دے مطابق درخاستاں الیکشن کمیشن وچ عام شہریاں ولوں دائر کیتیاں گئیاں سن، جہناں نوں الیکشن کمیشن نے نامکمل قرار دے کے رَد کر دِتا اے۔ وزیر اعظم خلاف دائر درخاست وچ آکھیا گیا کہ وزیر اعظم نواز شریف دے لندن وچ کروائے گئے علاج اُتے کروڑاں رُپئے خرچ ہوئے، ملک وچ غریب نوں علاج دیاں سہولتاں نہیں دِتیاں جاندیاں پر وزیر اعظم علاج لئی لندن چلے گئے۔
جہدے اُتے الیکشن کمیشن نے جواب دِتا کہ وزیر اعظم دے لندن وچ کروائے گئے علاج نال ساڈا کوئی تعلق نہیں اے، تُسیں عدالت جاﺅ۔ دوجے پاسے الیکشن کمیشن وچ عمران خان خلاف نااہلی دی درخاست وچ، درخاست گزار نے موقف اختیار کیتا کہ عمران خان نے بھین دے ناں اُتے آف شور کمپنی بنائی ہوئی اے، درخاست وچ آکھیا گیا کہ عمران خان نے زکوة دا جمع کیتا گیا پیسہ اوتھے خرچ کیتا، جہدے اُتے الیکشن کمیشن دا کہنا سی کہ عمران خان دے حوالے نال دِتا گیا جواز مناسب نہیں اے۔ الیکشن کمیشن نے درخاست گزاراں نوں ہدایت کیتی کہ مکمل ثبوتاں نال تُسیں عدالت جاﺅ۔
