امجد صابری نوں فرقے دی حمایت پاروں قتل کیتا: ملزماں دی تفتیشی رپورٹ

میرا گھر امجد صابری دے گھر دے نیڑے سی، ریکی کر کے 5دِناں وچ امجد صابری دے قتل دا منصوبا بنایا: عاصم کیپری

امجد صابری نوں فرقے دی حمایت پاروں قتل کیتا: ملزماں دی تفتیشی رپورٹ
میرا گھر امجد صابری دے گھر دے نیڑے سی، ریکی کر کے 5دِناں وچ امجد صابری دے قتل دا منصوبا بنایا: عاصم کیپری

کراچی(پاکستان پوائنٹ نیوز24۔نومبر۔2016ء) کاﺅنٹر ٹیرر ازم ڈپارٹمنٹ پولیس ہتھوں ہائی پروفائل کیس وچ گرفتار کیتے جان والے دہشت گرد عاصم کیپری تے اسحاق بولی نے مشہور قوال امجد صابری نوں مجلساں وچ زیادا جان تے اک فرقے دی حمایت کرن اُتے قتل کیتا، تبت سنٹر تے پارکنگ پلازا وچ چار فوجی جواناں دا قتل مارے جان والے نعیم بخاری دے کزن دا بدلا لین، اورنگی تے اتحاد ٹاﺅن وچ ہون والے آپریشن توں توجہ ہٹان لئی کیتا سی، دہشت گرداں نے تفتیش دوران 58بندیاں نوں قتل کرن دا اعتراف کیتا اے۔

تفصیل دے مطابق کاﺅنٹر ٹیرر ازم ڈیپارٹمنٹ ہتھوں گرفتار کالعدم تنظیم لشکر جھنگوی (نعیم بخاری) گروپ دے دو دہشت گرداں عاصم عرف احمد عرف کیپری عرف ماموں عرف مصطفی نے انٹرو گیشن رپورٹ وچ انکشاف کیتا اے کہ رمضان دے مہینے وچ میری ملاقات اسحاق عرف بوبی نال اک جنرل سٹور دی دُکان اُتے ہوئی، ایس دوران امجد صابری بارے گل ہون لگی تے اسحاق بوبی نے پُچھیا کہ امجید صابری کیویں دا بندا اے، میں نیٹ اُتے ویکھیا اے کہ اج کل اوہ بہت نوحے پڑھ رہیا اے تے اہل تشیع دیاں مجلساں وچ وی جاندا اے۔

اوہنے ہور دسیا کہ اسحاق نے نیٹ وچ چیک کیتا کہ امجد صابری ٹی وی اُتے خرم ذکی نال صحابہ کرام خلاف گل بات کررہیا سی تے اوہدے علاوا محرماں وچ پورا شیعہ ہو جاندا اے، گل بات دے دوران اوہنوں قتل کرن دی منصوبا بندی کیتی۔ عاصم کیپری نے انٹروگیشن وچ دسیا کہ میرا گھر امجد صابری دے گھر دے نیڑے سی میں اپنے گھر توں مارکیٹ جاندا تے ڈھائی توں تن وجے دوپہر امجد صابری دی گڈی نہیں ہوندی سی، شاید امجد صابری اوس ویلے گھروں نکلدا سی، 12ویں دیہاڑے میں تے اسحاق بوبی کسے نوں شاپر دین فرقانیہ مسجد کول گئے تے واپس آن لگے تے ایس دوران امجد صابری اپنے گھروں نکل کے اپنی چِٹی کار وچ بِہ رہیا سی اسیں دوواں نے امجد صابری دی ریکی کیتی تے ویکھیا کہ ایہ کتھے جا رہیا اے، امجد صابری گھروں نکل کے تایا دے ہوٹل اُتے گیا تے اوتھوں مین سڑک اُتے نکل گیا، لیاقت آباد نمبر 10اُتے پہنچیا تے اوتھوں سِدھا سوک سینٹر ول مُڑ گیا۔

غریب آباد انڈر بائی پاس توں ہوندا ہویا سوک سینٹر والی سڑک اُتے نکل گیا تے اسیں واپس اپنی دُکان اُتے آ گئے، اسیں پنج دن امجد صابری نوں قتل کرن دے حوالے نال پروگرام ترتیب دِتا، اک دن اسحاق بوبی نے اک نائن ایم ایم پستول بیگ (کیچر) وچ رکھیا تے اک 30بور پستول وی لائی تے میں وی اک نائن ایم پستول رکھ لئی، اسیں پونے 3وجے دُکان توں نکلے تے میں اسحاق بوبی نوں لیاقت آباد نمبر 10توں پہلے امام بارگاہ والی گلی وچ فرنیچر دی دُکان اُتے لاہ دِتا تے آپ تایا دے ہوٹل اُتے چلا گیا جتھوں امجد صابری نکلدا سی، تھوڑی دیر بعد ای مینوں امجد صابری دی گڈی آﺅندی ہوئی نظر آئی تے میں فوری اسحاق کول چلا یاگیا، اوہدے بعد اسیں دوویں موٹر سائیکل اُتے بِہ کے لیاقت آباد نمبر 10توں سوک سینٹر والی سڑک توں مُڑ کے شوروم نیڑے واٹر بورڈ دفتر کول کھلو گئے، اسحاق نے ٹوپی پائی ہوئی سی تے میں میڈیکل ماسک لایا ہویا سی، میں موٹر سائیکل امجد صابری دی کار نال لا دِتی، اسحاق بوبی نے بیگ (کیچر) والے نائن ایم ایم پستول توں چلدی کار اُتے فائرنگ کر دِتی، شاید امجد صابری نوں گولی وَج گئی تے گڈی رُک گئی ۔

اسحاق بوبی نے موٹر سائیکل توں لتھ کے کار ول گیا تے اوہنے دوبارا ڈرائیونگ سیٹ اُتے کئی فائر کیتے، اسحاق بوبی 30بور والے پستول نال فائرنگ کر رہیا سی، اسحاق واپس بائیک اُتے بیٹھا تے اسیں شریف آباد جان والی گلی وچ مُڑ کے اندر گلیاں وچ وڑ گئے، ٹوپی تے میڈیکل ماسک لا کے اسیں کریم آباد ول چلے گئے، اوتھوں فیر لیاقت آباد نمبر 10 والا پل پار کر کے اپنی دُکان لیاقت آباد ڈاکخانا پہنچ گئے تے اسلحا دُکان اُتے رکھ دِتا تے اوہدے بعد اسحاق بوبی چلا گیا۔

اسحاق عرف بوبی نے وی انٹروگیشن رپورٹ وچ انکشاف کیتا کہ میں ٹوپی، میڈیکل ماسک تے کالی عینک پائی ہوئی سی، عاصم کیپری کالا ہیلمٹ تے کالا اپر پایا ہویا سی، 18جون نوں میں تے عاصم کیپری امجد صابری دے گھر نیڑے گئے تے اک جنرل سٹور اُتے کھلو گئے، تھوڑی دیر بعد امجد صابری دی کار نکلی تے نیڑے پان دی دُکان اُتے رک گئی، امجد صابری نے کار وچ بیٹھے بیٹھے تیار پان لئے تے چلا گیا فیر اساں دوواں نے امجد صابری دی ریکی شروع کر دِتی تے 4دن بعد امجد صابری نوں قتل کر دِتا۔