اسلام آباد(پاکستان پوائنٹ نیوز24۔نومبر۔2016ء) پاکستان نے آزاد کشمیر وچ کنٹرول لائن دے نیڑے بھارتی فوج ولوں اک مسافر بس تے اک ایمبولینس نوں نشانابنان دا معاملا اقوام متحدا وچ چُکدے ہوئے ایس بھارتی اقدام نوں بین الاقوامی قانون دیاں سنگین خلاف ورزی قرار دِتا اے۔ اقوام متحدا وچ پاکستان دی مستقل مندوب ڈاکٹر ملیحہ لودھی نے اقوام متحدا دے ڈپٹی سیکرٹری جنرل جان الیاسن تے سیکرٹری جنرل بان کی مون دے چیف ڈی کیبنٹ ایڈمنڈ مولے نوں بریفنگ دیندے ہوئے آکھیا کہ کنٹرول لائن اُتے بھارتی فوجیاں دی جارحانا کارروائیاں خاص کر مسافر بس تے ایمبولینس اُتے حملا بین الاقوامی قانون دیاں سنگین خلاف ورزیاں نیں۔
اقوام متحدا وچ پاکستانی مشن ولوں جاری بیان دے مطابق ڈاکٹر ملیحہ لودھی نے آکھیا کہ خاص کر زخمیاں نوں ہسپتال منتقل کرن لئی گھلی گئی ایمبولینس نوں نشانا بنانا بھیڑا کم تے اقوام دے بنیادی انسانی قوانین دی خلاف ورزی اے۔ اوہناں نے آکھیا کہ کنٹرول لائن اُتے بھارت ولوں پیدا کردا صورتحال بین الاقوامی امن و سلامتی لئی وی ڈاڈھا خطرا اے۔ اوہناں دا کہنا سی کہ کنٹرول لائن اُتے کشیدگی وچ وادھا بھارت ولوں مقبوضہ کشمیر وچ وڈے آنکڑیاں اُتے انسانی حقاں دیاں خلاف ورزیاں توں توجہ ہٹان دی سوچی سمجھی کوشش اے۔
اوہناں نے آکھیا کہ حالیا کارروائی ایس لحاظ نال وی زیادا خطرناک اے کہ ایہدے وچ بھارتی فوجیاں نے عام شہریاں نوں نشانا بنایا اے۔ اقوام متحدا دے سینئر حکام نے وی ایس تشویش دا وکھالا کیتا کہ پاکستان تے بھارت وچکار کنٹرول لائن اُتے صورتحال کنٹرول توں باہر ہو سکدی اے۔ ایس توں وکھ پاکستان نے بھارت و پاکستان دے اقوام متحدا وچ فوجی مبصر نوں وی متحریک کرن دا مطالبا کیتا تے آکھیا کہ اوہ کنٹرول لائن اُتے سیز فائر دی موثر نگرانی کرن۔
پاکستانی مندوب نے اقوام متحدا دے حکام نوں کشمیریاں دی تحریک آزادی دی تازا ترین صورتحال توں وی آگاہ کیتا۔ اوہناں نے آکھیا کہ 8جولائی نوں نوجوان کشمیر رہنما برہان وانی دی شہادت دے بعد مقبوضہ کشمیر وچ نماز جنازہ دی ادائیگی تے بھارتی فوجیاں ولوں اوہناں دے قتلام خلاف احتجاج اُتے مقبوضہ کشمیر وچ بھارتی فوجی طاقت دا انھے واہ استعمال کر رہے نیں۔ پاکستانی مندوب نے آکھیا کہ اقوام متحدا ایس صورتحال نوں اک مکمل جھیڑے دی صورتحال اختیار کرن توں بچان لئی موثر اقدامات کرے۔ یاد رہوے کہ اقوام متحدا ولوں کنٹرول لائن اُتے کشیدگی گھٹ کرن دیاں بار بار گلاں ہوندیاں نیں پر ایہدے مگروں وی بھارت مقبوضہ کشمیر وچ اپنے ظلم جاری رکھے ہوئے اے۔
