کراچی(پاکستان پوائنٹ نیوز24۔نومبر۔2016ء) ائر چیف مارشل سہیل امان دا کہنا اے کہ پاکستان دیاں تِنوں ہتھیار بند فوجاں ہر ویلے تیار نیں، اوہناں نے آکھیا کہ جے بھارت تحمل نال رہوے تے چنگا اے۔ تقریب نال خطاب کردے ہوئے ائر چیف مارشل سہیل امان نے آکھیا کہ مقبوضہ کشمیر وچ اڑی واقعے دے بعد پیدا ہون والی کشیدگی اُتے مکمل نظر اے۔ اوہناں نے آکھیا کہ آپریشن ضرب عضب دہشت گرداں خلاف اک مکمل جنگ اے تے ایس آپریشن وچ کسے نوں کوئی شک نہیں ہونا چاہیدا۔
ائر چیف دا کہنا سی کہ ایل او سی اُتے بھارتی جارحیت توں واقف آں، بھارت تحمل نال رہوے تے چنگا اے۔ سہیل امان نے آکھیا کہ بھارت نوں چاہیدا اے کہ مسئلا کشمیر دے حل اُتے توجہ دیوے، بھارت اصولاں اُتے گل کرے تے مسئلا کشمیر نوں حل کرے۔ اوہناں دا کہنا سی کہ اسیں سرحداں اُتے کسے وی صورتحال نال نبڑن لئی پوری طرحاں تیار آں۔ نائیجیریا تے قطر لئی سپر مشتاق جہاز تیار کر رہے آں۔ اوہناں نے دسیا کہ ترکی نال جہازاں دی فراہمی دا سمجھوتا ہو گیا اے جدکہ دوست ملکاں دیاں ہتھیار بند فوجاں نال باہمی تعلقات مضبوط بنا رہے آں۔ ائر چیف مارشل نے ہور آکھیا کہ ملک وچ جہاز بنان دی صنعت مضبوط ہو رہی اے۔
