اسلام آباد(پاکستان پوائنٹ نیوز23۔نومبر۔2016ء) الیکشن کمیشن وچ پی ٹی آئی چیئرمین عمران خان تے پی ٹی آئی رہنما جہانگیر ترین خان خلاف درخاست دی سنوائی ہوئی۔ عمران خان تے جہانگیر ترین ولوں نعیم بخاری نے اپنا وکالت ناما جمع کروایا تے عدالت توں مہلت منگی۔ جہدے اُتے عمران خان تے جہانگیر ترین دی نااہلی لئی دائر درخاست دی ہور سنوائی نوں 6دسمبر تیک ملتوی کردِتا گیا جدکہ الیکشن کمیشن نے عمران خان تے جہانگیر ترین توں جواب وی منگ لیا اے۔
کیس دے حوالے نال میڈیا نال گل بات کردے ہوئے حنیف عباسی دا کہنا سی کہ اسیں عمران خان نوں عدالت وچ بے نقاب کراں گے، عمران خان دے وکیل نے اج فیر عدالت توں ویلا منگیا اے جہدے بعد ایہ گل ثابت ہو گئی اے کہ عمران خان تلاشی نہیں دینا چاہندے۔ اوہناں دا کہنا سی کہ سوٹیاں نہ کھان والے خونی انقلاب دیاں گلاں کر رہے نیں۔ حنیف عباسی نے اعلان کیتا کہ جے میں عمران خان دی کرپشن ثابت نہ کر سکیا تے قوم توں معافی منگاں گا۔
