قطری شہزادہ قومی خزانے دی لُٹ مار، منی لانڈرنگ تے ہور جرماں وچ ملوث نکلیا

شریف خاندان دے حق وچ گواہی دین والا حمد بن جاسم بن جبار الثانی اپریل 2007توں 26جون 2013تیک قطر دا وزیر اعظم جدکہ جنوری 1992توں 26جون 2013تیک قطر دا وزیر خارجا رہےا، قطری شہزادے دیاں 2آف شور کمپنیاں وچ شیئرز نیں، اسلحا ڈیل دے دوران 70لکھ پونڈ دی منی لانڈرنگ وی کیتی

قطری شہزادہ قومی خزانے دی لُٹ مار، منی لانڈرنگ تے ہور جرماں وچ ملوث نکلیا
شریف خاندان دے حق وچ گواہی دین والا حمد بن جاسم بن جبار الثانی اپریل 2007توں 26جون 2013تیک قطر دا وزیر اعظم جدکہ جنوری 1992توں 26جون 2013تیک قطر دا وزیر خارجا رہےا، قطری شہزادے دیاں 2آف شور کمپنیاں وچ شیئرز نیں، اسلحا ڈیل دے دوران 70لکھ پونڈ دی منی لانڈرنگ وی کیتی

اسلام آباد(پاکستان پوائنٹ نیوز16۔نومبر۔2016ء) قطری دا شہزادا شیخ حمد بن جاسم الثانی قومی خزانے دی لُٹ مار، منی لانڈرنگ تے ہور جرماں وچ ملوث نکل آیا، شیخ حمد بن جاسم الثانی دا سپریم کورٹ وچ پاناما لیکس کیس وچ شریف خاندان ولوں اک خط جمع کروایا گیا سی جہدے وچ آکھیا گیا اے کہ شریف خاندان نے لندن وچ فلیٹس اوہناں ولوں دِتے گئے پیسیاں نال خریدے تے ایہ پیسے حمد بن جاسم تے شریف خاندان دے رئیل سٹیٹ دے سانجھے کاروبارنال خریدے گئے۔

تفصیل دے مطابق قطر دے سابق وزیر اعظم تے وزیر خارجا شیخ حمد بن جاسم الثانی 1959نوں پیدا ہوئے۔ شریف خاندان دے حق وچ گواہی دین والا حمد بن جاسم بن جبار الثانی اپریل 2007توں 26جون 2013تیک قطر دا وزیر اعظم جدکہ جنوری 1992توں 26جون 2013تیک قطر دا وزیر خارجا رہیا، اوہناں دا ناں پاناما لیکس وچ وی آیا اے، پاناما لیکس دے مطابق قطری شہزادے حمد بن جاسم دیاں دو آف شور کمپنیاں وچ شیئرز نیں، حماد بن جاسم وی مختلف الزاماں دی زد وچ رہے نیں، اوہناں اُتے منی لانڈرنگ تے رشوت دے الزام وی لگدے رہے نیں۔

اوہناں نے قطر دی اک اسلحا ڈیل دے دوران 78لکھ پونڈ دی منی لانڈرنگ کیتی سی تے سمز نال 500ملین پاﺅنڈ مالیت دی اسلحا ڈیل وچ 7ملین پاﺅنڈ کمیشن اوہناںدی کمپنی نوں منتقل کیتا گیا، جس کمپنی دا شہزادا حمد بن جاسم بینی فیشری سی، حمد بن جاسم دا کمیشن ہیب تے ہوانہ نامی ٹرسٹ دے اکاﺅنٹ وچ جمع کرایا گیا، اسلحا ڈیل ویلے اوہ وزیر خارجا سی، بی اے ای ولوں ڈیل دی مد وچ قطر دے شہزادے نوں 7ملین پاﺅنڈ دا کمیشن دِتا گیا سی۔

شیخ حمد بن جاسم 500ملین پاﺅنڈ دی اسلحا ڈیل ویلے قطر دے وزیر خارجا سی، 7ملین پاﺅنڈ دا کمیشن شیخ حمد بن جاسم دی نیوجرسی وچ آف شور اکاﺅنٹس وچ وی جمع کرایا گیا سی، منی لانڈرنگ روکن دی مہم دے نتیجے وچ نیوجرسی فنانشلز کمیشن نے 7ملین پاﺅنڈز منجمد کیتے سن، نیوجرسی فنانشلز سروسز کمیشن نے قطر توں آن والے 7ملین پاﺅنڈ فریز کرن دے بعد تحقیقات شروع کر دِتیاں۔

حمد بن جاسم نے نیو جرسی کمیشن وچ رضا کارانا تلافی دی مد وچ 6ملین پاﺅنڈ دی ادائیگی کیتی، حمد بن جاسم اُتے قطر دے سا بق سرکاری ترجمان فواز العطیہ اُتے تشدد تے غیر قانونی حراست دا الزام وی اے تے اوہناں اُتے فواز العطیہ نے لندن وچ کیس وی درج کرایا ہویا اے، فواز العطیہ نے الزام لایا اے کہ شیخ حمد بن جاسم الثانی نے مغربی دوحہ وچ 20ہزار میٹر زمین خریدن لئی دباءپایا تے ہراساں کیتا۔

ایس توں وکھ قطری حکومت نے شیخ حمد بن جاسم دی سرکاری پیسیاں دی دنیا بھر وچ نجی اکاﺅنٹس وچ منتقلی دیاں تحقیقات شروع کیتیاں۔ بعد وچ قطری حکومت نال اک سمجھوتے دے بعد ایہناں تحقیقات تے مقدمیاں نوں ختم کر دِتا گیا پر ایہدے بعد قطری حکومت نے شیخ حمد بن جاسم اُتے سمجھوتے اُتے عمل نہ کرن دا الزام لایا تے آکھیا کہ شیخ حمد بن وعدے دے مطابق پیسےاں دی ادائیگی وچ ناکام ہو گئے نیں۔