پاناما لیکس کیس: 1947توں حساب شروع کیتا تے 20ورھیاں تیکر فیصلا نہیں ہو سکے گا: چیف جسٹس

تحریک انصاف دے جمع کرائے گئے اخباری کٹ پیس رَد

پاناما لیکس کیس: 1947توں حساب شروع کیتا تے 20ورھیاں تیکر فیصلا نہیں ہو سکے گا: چیف جسٹس
تحریک انصاف دے جمع کرائے گئے اخباری کٹ پیس رَد

اسلام آباد(پاکستان پوائنٹ نیوز15۔نومبر۔2016ء) سپریم کورٹ وچ پاناما لیکس کیس دی سنوائی شرو ع ہو گئی اے۔ چیف جسٹس دی سربراہی وچ 5رکنی لارجر بنچ کیس دی سنوائی کر رہیا اے۔ چیف جسٹس انور ظہیر جمالی نے ایس موقعے اُتے آکھیا کہ اسیں ایس نکتے نوں ویکھےاں گے تاں جے جلدی بازی وچ انصاف دے تقاضے نظر انداز نہ ہون، اسیں عمران خان دا مقدما ایس لئی چُکیا کہ چار پنج اپارٹمنٹس دا سوال سی، عمران خان دی درخاست نوں ٹیسٹ کیس دے طور اُتے چُکیا۔

چیف جسٹس نے آکھیا کہ تحقیقات کرنا عدالت دا کم نہیں۔ 1947توں حساب شروع کیتا تے 20ورھیاں تیکر فیصلا نہیں ہو سکے گا۔ چیف جسٹس نے ہور آکھیا کہ 700صفحے اک نے جدکہ 1600دوجے نے جمع کرائے نیں۔ اسیں کوئی کمپیوٹر تے نہیں آں کہ اک منٹ وچ صفحیاں نوں سکین کر لیئے، اسیں بار بار آکھ رہے آں سپریم کورٹ تفتیشی ادارا نہیں اے، پاناما لیکس اُتے اینیاں درخاستاں آ رہیاں نیں شاید وکھ سیل کھولنا پئے۔

ایس موقع اُتے جسٹس عظمت سعید نے حامد خان نوں آکھیا کہ پی ٹی آئی دیاں دستاویزات وچ اخباری کٹ پیس وی شامل نیں، پی ٹی آئی دیاں ایہناں دستاویزات دا کیس نال کوئی تعلق ای نہیں، درخاست گزار نے سچ نوں آپ دفن کر دِتا اے۔ نعیم بخاری نے جو کاغذات جمع کرائے اوہناں دی لوڑ نہیں سی۔ اخباراں دے کٹ پیس کوئی ثبوت نہیں ہوندے، اخباری کٹ پیس الف لیلی دیاں کہانیاں نیں۔

کل 6636دستاویزات جمع کرائیاں گئیاں جہناں دا کیس نال کوئی تعلق نہیں۔ جسٹس عظمت سعید نے ہور آکھیا کہ پہلے تُسیں چار فلیٹس دا آکھیا پر ہُن 1982توں لے کے ہُن تیک دےاں دستاویزات جمع کرا دِتیاں، ایہناں دستاویزات دا کوئی سِر پیر نہیں اے، اوہ دستاویزات دیو جہناں نال معاملات نوں اگے ودھایا جا سکے۔ اخباری خبر دی بنیاد اُتے فیصلے نہیں کیتے جا سکدے، جے کل کوئی خبر چھپ جائے تے کیہ اج اوہدے اُتے فیصلا دے دئیے؟