لاہور، اسلام آباد(پاکستان پوائنٹ نیوز14۔نومبر۔2016ء) پاکستان تحریک انصاف دی قیادت ولوں ترک صدر طیب اردگان دے پارلیمنٹ دے سانجھے اجلاس نال خطاب دے بائیکاٹ دے فیصلے اُتے پارٹی اندر پُھٹ پے گئی، کئی ارکان اسمبلی ناراض ہو گئے۔ کئی ارکان اسمبلی دا کہنا اے کہ ساڈے نال ایس معاملے اُتے مشورا ای نہیں کیتا گیا۔نجی ٹی وی دے مطابق پی ٹی آئی نے ہفتے دے دیہاڑے ایس گل دا اعلان کیتا سی کہ اوہدے ارکان 17نومبر نوں سَدے گئے پارلیمنٹ دے سانجھے اجلاس وچ رلت نہیں کرن گے۔
میڈیا سٹرٹیجی کمیٹی دے اجلاس دے بعد تحریک انصاف دے وائس چیئرمین شاہ محمود قریشی نے اعلان کر دِتا سی کہ پارٹی نے ایہ فیصلا کیتا اے کہ اوہ اوس اجلاس وچ رلت نہیں کر سکدی جہدی سربراہی اک متنازع وزیر اعظم کر رہیا اے تے جہنوں کرپشن دے الزاماں دا ساہمنا اے۔ پر پارٹی دے ایس فیصلے اُتے کئی ارکان اسمبلی نے ناراضگی دا وکھالا کیتا، خیبر پختونخوا توں تعلق رکھن والے پی ٹی آئی دے اک رکن اسمبلی نے آکھیا کہ مینوں سویرے اخبار راہیں پتا چلیا کہ پارٹی نے پارلیمنٹ دے سانجھے اجلاس دے بائیکاٹ دا فیصلا کیتا اے۔
رکن اسمبلی نے گِلا کیتا کہ پارٹی قیادت وچوں کسے نوں زحمت نہیں ہوندی کہ اوہ کسے اقدام اُتے ارکان اسمبلی دی رائے وی لے لووے۔ پارٹی وسیلیاں نے نجی ٹی وی نوںد سیا کہ پارٹی نے سانجھے اجلاس وچ رلت نہ کرن دا اعلان کرن توں پہلے سینیٹ وچ اپنے پارلیمانی لیڈر نعمان وزیر نال وی مشورا نہیں کیتا۔ اک ہور رکن اسمبلی نے آکھیا کہ ایہ عجیب گل اے کہ اک پارتی جو جدید ٹیکنالوجی تے وائٹس ایپ تے ٹوئٹر دے ذریعے رابطے دے حوالے نال پچھانی جاندی اے اوہنے فیصلا دا اعلان کرن توں پہلے اوہناں وسیلیاں نوںورتدے ہوئے ارکان توں رائے ای نہیں منگی۔
اوہناں نے آکھیا کہ سانوں مسلسل قومی اسمبلی دے اجلاس دے بائیکاٹ دے فیصلے دی منطق نہیں آﺅندی جدکہ پارٹی دے مطالبیاں وچ اک مطالبا ایہ اے کہ وزیر اعظم اپنے آپ نوں احتساب لئی پیش کرن جو کہ پورا وی ہو گیا اے۔ اوہناں دا کہنا سی کہ جے پارٹی سپریم کورٹ وچ پاناما لیکس دی سنوائی شروع ہون دے بعد اپنا دھرنا منسوخ کر سکدی اے تے فیر پارلیمنٹ دا بائیکاٹ جاری رکھن دی کوئی وجہ سمجھ نہیں آﺅندی۔
اوہناں دا ایہ وی کہنا سی کہ پارٹی دے بنیادی ڈھانچے وچ نام نہاد سٹریٹجی دا کوئی کردار نہیں اے۔ پی ٹی آئی ایڈوائزری کمیٹی دے سابق رکن عبدالقیوم کنڈی نے بیان جاری کیتا کہ پارٹی دے رکن دی حیثیت نال اوہ غیر آئینی تے غیر قانونی کمیٹی ولوں کیتے جان والے پارلیمنٹ دے سانجھے اجلاس دے بائیکاٹ دے فیصلے دی مخالفت کردے نیں۔ اوہناں نے آکھیا کہ سانوں ترک صدر دے دورا پاکستان نوں اپنی اندرونی سیاست پاروں متنازع نہیں بنانا چاہیدا۔
پی ٹی آئی پہلے ای سی پیک دے حوالے نال متنازع بیان دے کے بہت حد تیک چینی دوستاں دی خیر خواہی توں محروم ہو گئی اے۔ اوہناں دا کہنا سی کہ صدر دے خطاب دے بائیکاٹ دے نتیجے وچ غلط پیغام جائے گا، میں چیئرمین عمران خان توں درخاست کرنا واں کہ اوہ اپنے فیصلے اُتے نظرثانی کرن تے پارلیمانی عمل دا حصہ بنن۔ ایس حوالے نال جدوں شاہ محمودقریشی نال رابطا کیتا گیا تے اوہناں نے فیصلے دا دفاع کردے ہوئے آکھیا کہ ارکان اسمبلی تے سینیٹرز توں ویلے دی کمی پاروں رابطا نہیں کیتا جا سکیا۔
اوہناں نے آکھیا کہ کمیٹی سینئر رہنماواں اُتے مشتمل اے جہدے وچ اوہناں سنے پی ٹی آئی دے سیکرٹری جنرل جہانگیر ترین، اسد عمر، شفقت محمود، عارف علوی، منزہ حسن تے شیریں مزاری شامل نیں۔ جدوں اوہناں نوں آکھیا کہ پارٹی دے میڈیا آفس ولوں اجلاس دیاں جاری کیتیاں جان والیاں تصویراں وچ نہ تے تُسیں او نہ ای جہانگیر ترین تے عارف علوی موجود سن تے اوہناں نے آکھیا کہ شائد میں تصویر کچھی جان دے بعد آیا ہوواں۔
شاہ محمود قریشی نے آکھیا کہ جہانگیر ترین ملتان تے عارف علوی کراچی وچ سن پر اوہناں نال مشاورت کیتی گئی پر اوہناں نے ایس گل دا اعتراف کیتا کہ جدید ٹیکنالوجی دی مدد لیندے ہوئے ارکان اسمبلی تے سینیٹرز نال وی رابطا کیتا جا سکدا سی۔ اوہناں نے آکھیا کہ پارلیمنٹ دا اجلاس جاری نہیں ایس لئی ہر رکن اسمبلی نال مشاورت کرنا ممکن نہیں، ارکان اسمبلی ایس گل دے پابند نیں کہ اوہ پارٹی قیادت دے فیصلیاںدی تائید کرن۔ شاہ محمود قریشی نے آکھیا کہ اوہناں دی قیادت وچ پی ٹی آئی دا وفد ترک سفیر نال ملاقات کرے گا تے بائیکاٹ دے فیصلے دی وجہ بارے اوہناں نوں دسیا جائے گا۔
