اسیں پاکستان تے کراچی وچ دہشت گردی نوں ختم کیتا:نواز شریف

2018وچ لوڈشیڈنگ دفن ہو جاوے گی، سی پیک نال پاکستان دا نقشہ بدل رہیا اے،کُجھ لوک ترقی دے ایجنڈے نوں روکنا چاہندے نیں پر ایہ سفر جاری رہوے گا: سانگلاہل وچ جلسے نال خطاب

اسیں پاکستان تے کراچی وچ دہشت گردی نوں ختم کیتا:نواز شریف
2018وچ لوڈشیڈنگ دفن ہو جاوے گی، سی پیک نال پاکستان دا نقشہ بدل رہیا اے،کُجھ لوک ترقی دے ایجنڈے نوں روکنا چاہندے نیں پر ایہ سفر جاری رہوے گا: سانگلاہل وچ جلسے نال خطاب

سانگلا ہل(پاکستان پوائنٹ نیوز11۔نومبر۔2016ء) وزیراعظم میاں نواز شریف نے آکھیا اے کہ اسیں پاکستان تے کراچی وچوں دہشت گردی نوں ختم کیتا اے، 2018وچ لوڈشیڈنگ دفن ہو جاوے گی، سی پیک نال پاکستان دا نقشہ بدل رہیا اے۔ تفصیل دے مطابق اج وزیر اعظم میاں نواز شریف نے سانگلا ہل وچ انٹرچینج دی افتتاحی تقریب دے موقعے اُتے جلسے نال خطاب کردے ہوئے آکھیا کہ میں ایتھوں دی لوکائی نال 2013وچ وعدا کیتا سی کہ حکومت آن اُتے انٹر چینج بنایا جائے گا، اج ایتھے انٹرچینج بن گیا۔

اوہناں دا کہنا سی کہ جو وی وعدا کیتا پورا کیتا اے، جے سانگلہ ہل دے لوک کجھ ہور وی منگدے تے ہور وی مل جاندا۔ ایس توں وکھ وزیر اعظم نے سانگلا ہل لئی سوئی گیس منصوبے دا وی اعلان کیتا۔ اوہناں نے آکھیا کہ سانگلا ہل دے لوک میرے نال بہت پیار کردے نیں، مینوں سوئی گیس منصوبے دا اعلان کرکے خشی ہوئی اے تے ایہ سوئی گیس دا بہت وڈا منصوبا اے جہدے نتیجے وچ گیس تہاڈے گھراں تیک جائے گی۔

اوہناں دا کہنا سی کہ کجھ لوک ترقی دے ایجنڈے نوں روکنا چاہندے نیں پر ایہ سفر جاری رہوے گا۔ وزیر اعظم نے آکھیا کہ انٹر چینج، موٹرویز بن رہیاں نیں جدکہ بجے دے کارخانے وی لائے جا رہے نیں۔ اوہناں دا کہنا سی کہ 2018تیک لوڈشیڈنگ ختم کر دیاں گے۔ وزیر اعظم دا کہنا سی کہ نواز شریف ہمیشہ بجلی دی لوڈ شیڈنگ نوں ختم کرن دی کوشش کردا رہندا اے، بجلی جدوں سستی ہووے گی تے لوکائی، کاشتکاراں، صنعتاں تے گھراں دے چُلھے بلن گے، سی پیک نال پاکستان دا نقشابدل رہیا اے۔

سیاسی مخالفاں اُتے وار کردے ہوئے نواز شریف داکہنا سی کہ جاﺅ جا کے کے پی کے ویکھو ، اوہ جو آکھدے سن کہ اسیں نواں کے پی کے بناواں گے، اوہ کیہ کر رہے نیں۔ اوہناں دا کہنا سی کہ اسیں پاکستان تے کراچی وچ دہشت گردی نوں ختم کیتا۔ تُسیں تن سال پہلے والا پاکستان ویکھو تے اج دا پاکستان ویکھو۔اوہناں دا کہنا سی کہ اج دنیا پاکستان دی ترقی نوں من رہی اے۔

پاکستان وچ ہر گھر وچ خشحالی آ رہی اے، ٹپر واسی وی خش نیں۔ اوہناں دا کہنا سی کہ پہلے لوک سانگلہ ہل توں ڈھائی گھنٹیاں وچ لاہور جاندے سن ہن ڈیڈھ گھنٹے وچ پہنچیا کرن گے جدکہ اوہ ویلا وی جلدی آئے گا جدوں سانگلہ ہل دا براہ راست لاہور تے اسلام آباد نال لنک ہووے گا۔ اوہناں نے آکھیا کہ پچھلیاں حکومت نے کوئی کم نہیں کیتا، اوہناں نے کوئی بجلی دا کارخانا نہیں لایا نہ ای کوئی موٹروے بنائی۔

وزیر اعظم نے اپنے خطاب وچ آکھیا کہ اسیں ریلوے تے پی آئی اے نوں وی ٹھیک کر رہے آں، پہلاں حاجیاں نوں لُٹیا جاندا سی جدکہ ہن حاجی سانوں دعاواں دے رہے نیں۔ اوہناں دا ہور کہنا سی کہ اسیں نوجواناں نوں لیپ ٹاپس دے رہے آں، پاکستان وچ 50بہترین ہسپتال بنا رہے آں، ننکانا وچ خوبصورت ہسپتال بنا رہے آں۔ ایس توںوکھ وزیر اعظم نے اپنے خطاب وچ ٹبہ شاہ تیک ڈبل ایکسپریس وے بنان دا اعلان وی کیتا۔