اسلام آباد(پاکستان پوائنٹ نیوز11۔نومبر۔2016ء) دفاعی تجزیا کار لیفٹیننٹ (ر) رضا محمد خان نے آکھیا اے کہ امریکا وچ احتجاجی سلسلا صدر ٹرمپ دی انتخابی مہم دے دوران بیاناں دا نتیجا اے۔ریڈیو پاکستان نال گل بات کردے ہوئے اوہناں نے آکھیا کہ امریکا دیاں مختلف ریاستاں وچ جاری احتجاجی سلسلا صدر ڈونلڈ ٹرمپ دی مہم دے دوران میکسیکن، مسلم تے ہور ملکاں توں تعلق رکھن والے امریکیاں دے حوالے نال دِتے گئے بیاناں دا نتیجا اے پر ٹرمپ دے صدر چُنے جان دے بعد دِتے گئے امریکی ترقی تے افہام و تفہیم بارے بیان تے اقتدار سنبھالن دے بعد دِتی جان والی بریفنگز دے نتیجے وچ صورتحال بدل گئی اے۔
اوہناں نے آکھیا کہ امریکی صدر نوں صدارتی عہدے تے دنیا بھر نال تعلقات دے حوالے نال بریفنگ دین دا سلسلا شروع ہو گیا اے۔ اک سوال دے جواب وچ اوہناں دا کہنا سی کہ امریکا محل وقوع دی وجہ توں خطے وچ پاکستان دی اہمیت توں پوری طرحاں جانو اے۔ امریکا ایہ وی سمجھدا اے کہ پاکستان دی فوج دنیا دی 6ویں وڈی فوج اے جہنے دہشت گردی خلاف جنگ وچ وڈیاں قربانیاں دِتیاں نیں۔ اوہناں دا کہنا سی کہ افغانستان وچ پاکستان دے مثبت کردار پاروں ای امن دی صورتحال بہتر ہو سکدی اے۔
