ٹرمپ انتظامیا نال رلکے خطے دے امن و استحکام لئی کم کراں گے: وزیر اعظم دے مشیر برائے خارجا امور دی نجی ٹی وی نال گل بات

ٹرمپ انتظامیا نال رلکے خطے دے امن و استحکام لئی کم کراں گے: وزیر اعظم دے مشیر برائے خارجا امور دی نجی ٹی وی نال گل بات

اسلام آباد(پاکستان پوائنٹ نیوز10۔نومبر۔2016ء) وزیر اعظم دے مشیر برائے خارجا امور سرتاج عزیز نے آکھیا اے کہ دنیا بھر وچ انتخابات جِتن لئی پالیسی بیانات دی نوعیت تے ہوندی اے پر جو پالیسی بیانات ہوندے نیں اوہناں دی نوعیت کُجھ ہور ہوندی اے، وزیر اعظم میاں نواز شریف نے ڈونلڈ ٹرمپ نوں کامیابی دی مبارکباد لئی خط لکھ دِتا اے، جہدے وچ ایہ گل وی لکھی گئی اے کہ پاکستان تے امریکا وچکار پچھلے 7دہاکیاں توں اک قریبی شراکت داری اے جو خطے لئی رلکے کم کردے رہے نیں تے مستقبل وچ وی ایس خطے دے امن تے سلامتی لئی کم کردے رہن گے۔

اوہناں نے آکھیا کہ اسیں ڈونلڈ ٹرمپ دے الیکشن لڑن دے پلیٹ فارم دا جائزا لیا اے تاں جے سانجھیاں شیواں نوں لبھ سکیے ، جہناں وچ انسداد دہشت گردی سبھ توں اہم اے کیوں جے ایہ امریکا دی وی ترجیح اے تے ساڈی وی۔ اوہناں دا کہنا سی کہ افغانستان وچ دہشت گردی دا سلسلا اج وی چل رہیا اے جہدے اُتے قابو نہیں پایا جا سکیا، ساڈی وی ایہو ترجیح اے کہ افغانستان وچ امن ہووے سیاسی عمل اگانہ ودھے تے خطا ترقی کرے۔

اوہناں نے آکھیا کہ ڈونلڈ ٹرمپ دی انتظامیا نال رلکے خطے دے امن و استحکام لئی کم کراں گے تے یقین دوواں گے کہ اسیں بغیر فرق کسے دے معاملات وچ دخل نہ دین دی پالیسی اُتے عمل کردے آں جو بین الاقوامی لوڑ دے بلکل مطابق اے، ایہدے علاوا نویں چُنے گئے صدر نے ایہ وی آکھیا اے کہ جے مینوں موقع ملیا تے میں بھارت تے پاکستان دے تعلقات نوں بہتر بنان لئی ثالثی کرنا چاہواں گا، جہدا اسیں وی خرمقدم کراں گے کہ اوہ مقبوضا کشمیر بارے بھارت دی توجہ دوان کہ اوتھے دہشت گردی دا مسئلا نہیں بلکہ لوک اپنے حقاں لئی پرامن تحریک جاری رکھے ہوئے نیں تے پچھلے 3مہینیاں توں وادی وچ حالات خراب نیں۔

اک سوال دے جواب وچ اوہناں نے آکھیا کہ میرے خیال وچ ڈونلڈ ٹرمپ کسے اُتے پابندیاں لا کے فری اکانومی مارکیٹ نوں نہیں چھیڑے گا، سرتاج عزیز نے ہور آکھیا کہ تواریخی لحاظ نال پاکستان دے امریکا نال 2011تے 2012وچ تعلقات سبھ توں کمزور سن کیوں جے اوس ویلے ریمنڈ ڈیوس، فیر سلالہ تے فیر اسامہ بن لادن دا واقعا ہویا پر اوہدے بعد 2013وچ اسیں امریکا نال اپنے ایہناں تعلقات نوں بہتر کیتا تے وزیر اعظم میاں نواز شریف نے امریکا دے دو دورے وی کیتے تے ہن اسیں پرعزم آں کہ ساڈے امریکا نال تعلقات وچ استحکام دے نال نال بہتری وی آئے گی۔