اسلام آباد(پاکستان پوائنٹ نیوز10۔نومبر۔2016ء) سپریم کورٹ وچ قومی اسمبلی دے حلقا این اے 110وچ دھاندلی دے حوالے نال کیس دی سنوائی چیف جسٹس انور ظہیر جمالی دی سربراہی وچ جسٹس امیر ہانی مسلم تے جسٹس اعجاز الاحسن اُتے مشتمل تن رکنی بنچ نے کیتی، سنوائی دوران عثمان ڈار دے وکیل بابر اعوان دے دلائل مکمل تے خواجا آصف دے وکیل فاروق ایچ نائیک دے دلائل جاری۔
کیس دی سنوائی کل تیکر ملتوی کر دِتی گئی اے۔ کیس دی سنوائی دے دوران چیف جسٹس نے اپنے ریمارکس وچ آکھیا کہ انتخابات توں پہلے سارے امیدواراں وچ مقابلا ہوندا اے پر انتخابات د ے بعد پتا چلدا اے کہ اصل مقابلا کہڑے کہڑے امیدواراں وچکار ہویا سی۔ جسٹس امیر ہانی مسلم نے اپنے ریمارکس وچ عثمان ڈار دے وکیل توں پُچھیا کہ جو دستاویزات تُسیں پڑھ رہے او، اوہ بطور ثبوت الیکشن ٹربیونل وچ پیش کیوں نہیں کیتے؟۔
پاکستان تحریک انصاف دے رہنما عثمان ڈار دے وکیل نے عدالت نوں دسیا کہ الیکشن ٹربیونل وچ غیر حاضر ہون اُتے سپریم کورٹ جو جرمانا کرے میں دین نوں تیار آں۔ میرا کیس الیکشن ٹربیونل وچ دوبارا گھلیا جائے تاں جے میں اپنا کیس پیش کر سکاں۔ دھاندلی کمیشن وچ قرار دِتا گیا سی کہ عام انتخابات 60فیصد درست سی۔ جہدے اُتے اجسٹس امیر ہانی دا کہنا سی کہ مال خانے وچ جو ریکارڈ جمع کرایا گیا اوہدا کوئی ریکارڈ نہیں اوہ کہنے جمع کروایا تے کہنے وصول کیتا۔
نادرا نے فرنزک آڈٹ وچ سبھ نوں حیران کر دِتا کہ اووٹراں دے انگوٹھےاں دا پورا نشان موجود نہیں اے۔ ایس لئی اوہدی شناخت نہیں ہو سکدی۔ خواجا آصف دے وکیل فاروق ایچ نائیک نے عدالت نوں دسیا کہ الیکشن ٹربیونل نے عثمان ڈرا دی اپیل نوں میرٹ اُتے خارج کیتا اے۔ 9پولنگ سٹیشن وچ دھاندلی دا الزام لایا گیا اے۔ پر بیان حلفی 10گواہاں نے جمع کروائے نیںجدکہ اوہ سارے وی اِکو جہے ای بیان دیندے نیں کوئی لفظ تبدیل نہیں کردا۔
اوہناں نے آکھیا کہ بابر اعوان ولوں درخاست وچ اپنی والدہ دی بیماری دے حوالے نال نہیں لکھیا گیا بلکہ اوہناں نے باہرلے ملک مختلف میٹنگز دا حوالا دِتا اے۔درخاست وچ والدہ دی بیماری دا حوالا نہیں دِتا گیا۔ جہدے اُتے چیف جسٹس نے آکھیا کہ تُسیں کہنا چاہندے اوہ کہ جو الزامات خواجا آصف اُتے لائے گئے نیں اوہناں دا حقیقت نال کوئی تعلق نہیں اے۔ عدالت نے کیس دی سنوائی اج تیکر ملتوی کر دِتی۔ فاروق ایچ نائیک دوبارا اپنے دلائل جاری رکھن گے۔ یاد رہوے کہ عثمان ڈار ولوں تحریک انصاف دا مقدما لڑن والے وکیل ڈاکٹر بابر اعوان تے خواجا آصف ولوں ن لیگ دا مقدما لڑن والے وکیل فاروق ایچ نائیک دوواں دا تعلق پیپلز پارٹی توں اے۔
