جہانیاں(پاکستان پوائنٹ نیوز09۔نومبر۔2016ء) مخدوم جاوید ہاشمی نے آکھیا اے کہ میں پیدائشی مسلم لیگی آں مرن دے بعد مسلم لیگی جھنڈے وچ دفن کرن دی خاہش دا اظہار وی کر چکیا واں، مسلم لیگ (ن) فیر کدوں جوائن کراں گا ایہدا ویلا متھیا نہیں اے، سی پیک منصوبے نال ایران، بھارت تے ہور ملکاں دا جھکاﺅ پاکستان ول ہووے گا، منصوبے پاروں اقتصادی ترقی دیاں راہواں کُھلن گیاں۔
ملک وسائل نال بھریا اے بدقسمتی نال چنگی لیڈر شپ نہیں مل سکی، نویں امریکی حکومت نوں پاکستان نال تعلقات ہور بہتر بنانے ہون گے، عمران خان دے اسلام آباد بند کرن دا منصوبا غلط سی ایہدے نال کارکن مایوس ہوئے۔ ایہناں خیالاں دا اظہارجاوید ہاشمی نے پرچا کاراں نال اُچیچی گل بات کردے ہوئے کیتا۔ ایس موقعے اُتے مسلم لیگ (ن) ریجن دے سیکرٹری اطلاعات چودھری خلیل احمد گھمن تے محمد عارف سعید وی موجود سن۔
مخدوم جاوید ہاشمی نے آکھیا کہ میں پیدائشی مسلم لیگی آں، ایہو جماعت میری پہلی تے آخری ترجیح اے، ہن دوبارا مسلم لیگ ن وچ رلت اختیار کرنی اے یاں نہیں ایس بارے اجے کوئی فیصلا نہیں کیتا تے نہ کوئی تاریخ متھی اے پر ایہ گل طے اے کہ مسلم لیگ (ن) ای میرا انتخاب ہووے گا۔ اوہناں نے امریکن الیکشن بارے گل بات کردے ہوئے آکھیا کہ پاکستان دے امریکا نال تعلقات کوئی ایڈے چنگے نہیں رہے جدکہ امریکا دے چائنا نال وی تعلقات ٹھیک نہیں، چائنا پاکستان دا دوست اے جدکہ امریکا دازیادا جھکاﺅ بھارت ول اے دوجے پاسے امریکا چائنا دا 63ٹریلین ڈالر دا قرضائی اے اوہ چین نال جنگ کرن دی پوزیشن وچ نہیں اے جدکہ پاکستان چائنا ورگی سپر پاور دا دوست اے ایس لئی میں سمجھنا واں کہ امریکا دی آن والی نویں حکومت چائنا نال تعلقات بہتر بنان لئی پاکستان نال اپنے تعلقات نوں بہتر بنائے گی۔
اوہناں دا کہنا سی کہ امریکا نوں جے افغانستان توں اپنے فوجیاں نوں کڈھنا اے تے فیر اوہنوں پاکستان نال اپنے تعلقات نوں ہور بہتر بنانا ہووے گا۔
