اسلام آباد(پاکستان پوائنٹ نیوز08۔نومبر۔2016ء) سپریم کورٹ وچ خواجا آصف خلاف این اے 110بارے اپیل دی سنوائی ہوئی۔ تفصیل دے مطابق سپریم کورٹ وچ این اے 110 وچ انتخابی دھاندلی بارے پی ٹی آئی رہنما عثمان ڈار نے اپیل دائر کیتی ہوئی جہدے اُتے اج سپریم کورٹ وچ چیف جسٹس دی سربراہی وچ تن رکنی بنچ نے سنوائی کیتی۔ سنوائی دے دوران دلائل دیندے ہوئے پی ٹی آئی رہنما عثمان ڈار دے وکیل بابر اعوان نے آکھیا کہ حلقے وچ 50ہزار ووٹ غیر تصدیق شدا سن۔
اوہناں نے آکھیا کہ حلقے وچ خواجا آصف دی جِت دا مارجن صرف 20 ہزار ووٹ سی۔ ریٹرنگ افسر خواجا آصف نال ملیا ہویا سی۔ جہدے اُتے چیف جسٹس امیر ہانی مسلم دا کہنا سی کہ ایہ وی سوال اے کہ حلقے وچ موجود غیر تصدیق شدا ووٹ کہنوں پئے؟ بابر اعوان نے عدالت نوں دسیا کہ این اے 110وچ کاﺅنٹر فائلز اُتے شناختی کارڈز وی غلط سن۔ جسٹس امیر ہانی مسلم نے پُچھیا کہ غیر تصدیق شدا شناختی کارڈ دا کیہ مطلب ہویا؟چیف جسٹس نے استفسار کیتا کہ تُسیں کِنے پولنگ بوتھاں توں ووٹ دیاں تصدیق کروائی؟ جہدے اُتے بابر اعوان نے آکھیا کہ غیر تصدیق شدا شناختی کارڈ دا مطلب ایہ اے کہ ووٹ رجسٹرڈ نہیں سن یاں اوہناں دے شناختی کارڈ دے نمبر پورے نہیں سن۔
بابر اعوان نے موقف دِتا کہ ریٹرنگ افسر نے الیکشن وچ دھاندلی کیتی، جہدے اُتے جسٹس امیر ہانی مسلم دا کہنا سی کہ ایس معاملے اُتے الیکشن کمیشن نوں بُلا کے اوہدا موقف سُننا ضروری اے۔ بابر اعوان دے دلائل مکمل نہ ہون اُتے سپریم کورٹ نے اپیل دی سنوائی نوں کل تیکر ملتوی کر دِتا۔ یاد رہوے کہ این اے 110 توں مسلم لیگ (ن) دے رہنما خواجا آصف کامیاب ہوئے سن جہدے بعد پی ٹی آئی رہنا عثمان ڈار نے اوہناں خلاف دھاندلی دی درخاست دائر کیتی ہوئی اے۔
