کراچی(پاکستان پوائنٹ نیوز08۔نومبر۔2016ء) ڈپٹی سپیکر سندھ اسمبلی شہلا رضا نوں قتل کرن تے سندھ اسمبلی نوں بم نال اُڈان دیاں دھمکیاں ملیاں نیں۔ تفصیل دے مطابق ڈپٹی سپیکر سندھ اسمبلی شہلا رضا نے دسیا کہ اوہناں نوں قتل کرن تے سندھ اسمبلی اُتے حملے دی دھمکی دا خط ملیا اے۔ شہلارضا نے دسیا کہ دھمکی والا خط سیٹلائٹ ٹاﺅن راولپنڈی توں پوسٹ کیتا گیا، خط پوسٹ کرن والیاں نے اپنا ناں تے ٹیلی فون نمبر وی لکھیا اے۔
شہلا رضا دا کہنا سی کہ خط وچ میرے توں 50کروڑ رُپئے بھتے دا مطالبا کیتا گیا اے تے آکھیا گیا اے کہ جے بھتا نہ دِتا تے بے نظیر بھٹو وانگ تینوں قتل کر دِتا جائے گا۔ اوہناں نے آکھیا کہ دھمکی والا خط ملن بارے ڈی جی رینجرز تے آئی جی سندھ نوں دَس دِتا اے جدکہ ایس خط بارے بلاول ہاﺅس تے سپیکر سندھ اسمبلی نوں وی دَس دِتا۔ شہلا رضا دا کہنا سی کہ میں دھمکیاں توں ڈرن والی نہیں آں۔ دوجے پاسے ڈی جی رینجرز سندھ نے شہلا رضا نوں اپنی سکیورٹی ودھان دی ہدایت کر دِتی اے۔
