اسلام آباد(پاکستان پوائنٹ نیوز08۔نومبر۔2016ء) پی ٹی آئی چیئرمین عمران خان نے پاکستان تحریک انصاف دا دو نومبر نوں دھرنا ملتوی کرن دی وجہ دَس دِتی۔ تفصیل دے مطابق نجی ٹی وی چینل نال گل بات وچ پی ٹی آئی چیئرمین عمران خان دا کہنا سی کہ پنجاب پولیس نے خیبر پختونخوا دے وزیر اعلا تے اوہناں دے نال آن والے کارکناں نوں روکیا، اوہناں نے آکھیا کہ پولیس ولوں شیلنگ کیتی جا رہی سی تے کارکناں دا بُرا حال سی جس پاروں کارکن لڑن اُتے آ گئے سن پر فیر میں وزیر اعلا کے پی کے نوں ٹیلی فون کیتا تے اوہناں نوں آکھیا کہ میں آکھ رہیا واں کہ تُسیں واپس چلے جاﺅ۔
عمران خان دا کہنا سی کہ جے میں اوہناں نوں واپس نہ گھلدا تے پولیس تے پشتوناں وچکار لڑائی ہو جاندی تے ایتھے خون خرابہ ہو جاندا تے صورتحال وِگڑ جانی سی۔ ایس صورتحال توں بچن لئی میں اوہناں نوں واپس چلے جان دا آکھیا سی، اوہ جان لئی وی تیار نہیں سن پر فیر وی اوہناں نے میری گل مَنی تے واپس چلے گئے۔ کپتان دا کہنا سی کہ لڑائی دی صورت وچ دوویں پاسے ای پاکستانی سن جے کُجھ وڈا ہو جاندا تے کون ذمے وار سی؟ اوہناں نے آکھیا جے لاشاں ڈِگنا شروع ہو جاندیاں تے ایہ شے کنٹرول توں باہر ہو جانی سی۔
