دریاخان(پاکستان پوائنٹ نیوز08۔نومبر۔2016ء) پی ٹی آئی دے کارکن اللہ دتہ ولوں عمران خان توں دو سو رُپئے فنڈ واپس منگن دی خبر جھوٹھی ثابت ہوئی، فرضی درخاست بنا کے اک نیوز چینل نے خبر چلائی بعد وچ ہور پرنٹ میڈیا تے کئی نجی ٹی وی چینلز نے وی ایس خبر نوں لفٹ کر کے اپنے ادارے وچ چھاپیا تے چلایا جدکہ حقیقت ایہدے اُلٹ اے، درخاست وچ وارڈ نمبر 5 محلا بنگیال آباد دا ذکر کیتا گیا جدکہ محلا بنگیال آباد وارڈ نمبر 5وچ نہیں آﺅندا تے نہ ای وارڈ نمبر 5تے محلا بنگیال آبادوچ اللہ دتہ ناں دا کوئی پی ٹی آئی دا کارکن رہندااے جہنے عمران خان نوں دو سورُپئے چندہ دِتا ہووے تے دھرنا ملتوی کرن اُتے عمران خان توں ایہ فنڈ واپس منگیا ہووے۔
دریا خان دے ورکنگ جرنلسٹ تے صحافتی حلقیاں نے ایس گل دی نندیا کیتی کہ انج دی فرضی درخاست اُتے نیوز چلا کے اپنے پیشہ وارانا ذمے واریاں نال بددیانتی کیتی گئی اے جہدے بعد شہر وچ پوری صحافتی برادری نوں ایس خبر اُتے تنقید دا نشانا بنایا جا رہیا اے۔ دلچسپ گل ایہ اے کہ جہڑے بندے نے درخاست اپ لوڈ کیتی اوہنے ایہ ہٹا لئی اے، ایس درخاست نوں سوشل میڈیا اُتے وی لوکاں دی وڈی گنتی نے تنقید دا نشانا بنایا جہدے بعد ایہ فرضی درخاست اپنے آئی ڈی توں ڈلیٹ کر دِتی گئی۔
