کراچی(پاکستان پوائنٹ نیوز07۔نومبر۔2016ء) کراچی دے علاقے ملیر 15وچ پیپلزپارٹی رہنما فیصل رضا عابدی تے ایم ڈبلیو ایم دے رہنماواں سنے ہور بندیاں دے گھراں اُتے چھاپیاں تے گرفتاریاں خلاف اج سویرے 7وجے توں احتجاج جاری اے۔ وکھالویاں نے گرفتار بندیاں دی رہائی لئی احتجاج کیتا، جو ہُن دھرنی دی شکل اختیار کر گیا اے۔ احتجاج وچ رلت وکھالویاں دا کہنا اے کہ رہنماواں تے ہور گرفتار کیتے گئے بندیاں دی رہائی تیک دھرنا جاری رکھاں گے۔
سویرے 7 وجے توں جاری ایس احتجاج پاروں ملیر نال جُڑے علاقیاں وچ صورتحال ڈاڈھی وِگڑ گئی اے۔ پولیس نے وکھالویاں نوں منتشر کرن دی کوشش کیتی جہدے اُتے وکھالویاں نے پولیس خلاف نعرے بازی کیتی۔ بعد وچ وکھالویاں تے پولیس وچکار مذاکرات وی ناکام ہو گئے۔ پولیس ولوں وکھالویاں اُتے شیلنگ تے ڈنڈے وی ورسائے گئے۔ احتجاج پاروں ٹریفک دا نظام وی متاثر ہویا اے جس پاروں لوکائی نوں اوکڑاں دا ساہمنا اے۔ دوجے پاسے وکھالویاں نال نبڑن لئی پولیس حکمت عملی طے کرن وچ مصروف اے۔ پولیس دا کہنا اے کہ جے ایہ منتشر نہ ہوئے تے سخت ایکشن لِتا جائے گا۔
