اسلام آباد(پاکستان پوائنٹ نیوز05۔نومبر۔2016ء) وفاقی وزیر داخلا چودھری نثار علی خان نے آکھیا اے کہ خبر لیک دیاں تحقیقات لئی پیر تیکر کمیٹی بنا ئے جان دا امکان اے، کمیٹی دا سربراہ ہائی کورٹ دا ریٹائرڈ جج ہووے گا جدکہ کمیٹی وچ حساس اداریاں دے افسر وی شامل ہون گے، انکوائری کمیٹی دے ناواں اُتے مشاورت مکمل کر لِتی گئی اے، کمیٹی دے ناں وزیراعظم نوں دِتے جان گے۔
اوہناں نے اج میڈیا نال گل بات کرد ے ہوئے آکھیا کہ خبر لیک دی انکوائری لئی پارلیمنٹ دی انکوائری کمیٹی نہیں بن سکدی۔ انکوائری کمیٹی انتظامی سطح دی ہووے گی جدکہ پارلیمانی کمیٹی دی لوڑ نہیں اے۔ اوہناں دا کہنا سی کہ کمیٹی نوں آزادانا تے شفاف ماحول وچ کم کرن دِتا جائے گا۔ اوہناں نے آکھیا کہ پرویز رشید خلاف کوئی تحقیقات نہیں ہو رہیاں، تحقیقات حساس تے جھوٹھی خبر باہر کڈھن والے بارے ہو رہیاں نیں۔ اوہناں نے آکھیا کہ وزیر اعظم چاہندے نیں کہ جو وی جھوٹھی خبر دا محرک اے اوہدی نشان کاری ہونی چاہیدی۔ اوہناں دا کہنا سی کہ قومی سلامتی دا معاملا بالاں دی کھیڈ نہیں اے۔
