کہوٹہ(پاکستان پوائنٹ نیوز04۔نومبر۔2016ء) وزیر اعظم محمد نواز شریف نے آکھیا اے کہ دھرنا دین والیاں دا ایجنڈا ملک نوں ترقی دین والا نہیں اے، اقوام متحدا وچ تن وار کشمیر دی گل کیتی، آئندا وی کراں گا، کسے توں ڈرن والے نہیں آں، ساڈے اُتے کوئی اُنگلی نہیں چُک سکداکہ اسیں رشوت لتی اے، تن سال پہلے 16،16 گھنٹے لوڈشیڈنگ ہوندی سی، (ن) لیگ دی حکومت آئی اے تے بجلی وی آ رہی اے، موٹرویز وی بندیاں نیں، اسیں دہشت گرداں دے لَک توڑے نیں، سمجھ نہیں آﺅندی کہ ساڈا جرم کیہ سی، مینوں تے خاقان عباسی نوں 14مہینے جیل وچ رکھیا گیا۔
اوہناں نے اج کہوٹہ وچ خطاب کردے ہوئے آکھیا کہ میں ویکھ رہیا واں کہ ایہ کِنا خوبصورت علاقا اے، ایتھوں دے واسی وی خوبصورت نیں۔ خطاب کردے ہوئے اوہناں دا کہنا سی کہ تُسیں دنیانوں وکھا دِتا کہ تُسیں مہذب قوم او تے کوئی گالھ کڈھن والا تہاڈا لیڈر نہیں ہو سکدا، پاکستانی لوک سچے لوک نیں جدکہ مسلسل جھوٹھ بولن والا تہاڈا نمائندا نہیں ہو سکدا، پاکستانی عزت کرن تے کروان والے لوک نیں جدکہ سرعام پگڑیاں اُچھالن والا تہاڈا لیڈر نہیں ہو سکدا۔
اوہناں نے آکھیا کہ کہوٹہ اندر الیکشن وچ اک وی ایسا امیدوار نہیں سی جہنے پگڑیاں اُچھالن والیاں دا ٹکٹ لِتا ہووے، ایہ بہت وڈی گل اے، اجے تے 2018 دا الیکشن ہونا، ہن توں ای تہاڈی ایہ خشی مخالفاں نوں ہضم نہیں ہو رہی۔ پاکستان ترقی کر رہیا اے، کہوٹہ ترقی کر رہیا اے۔ اوہناںدا کہنا سی کہ نڑھ تے کہوٹہ وچ گیس تے بجلی وی آ رہی اے، مخالف چاہندے نیں کہ ترقی دا سفر رُک جاوے۔
اوہناں نے آکھیا کہ جے پاکستان وچ موٹروے بنی تے مسلم لیگ (ن) دے دور وچ بنی ، پاکستان وچ اقتصادی ترقی، دفاعی ترقی، ایٹمی دھماکے ساڈی حکومت وچ ای ہوئے جدکہ کشمیر دی گل وی مسلم لیگ (ن) دی حکومت ای کردی اے۔ اوہناں دا کہنا سی کہ اقوام متحدا وچ 3وار کشمیر دی گل کیتی تے آئندا وی گل کرداں رہواں گا۔وزیر اعظم دا کہنا سی کہ اسیں کسے توں ڈرن والے نہیں آں۔
