سانوں ایہ یقین اے وزیراعظم دے نااہل ہون دے بعد نویں انتخابات وی ہو سکدے نیں: نعیم الحق

لاہور(پاکستان پوائنٹ نیوز04۔نومبر۔2016ء) تحریک انصاف دے رہنما نعیم الحق نے آکھیا اے کہ نواز شریف دے خلاف جِنے ثبوت نیں، یقین اے کہ اوہ نااہل ہو جان گے، (ن) لیگ والیاں کول ساڈے کسے رکن خلاف ثبوت ہے اے تے اوہ عدالت وچ لے کے آن اسیں ساہمنا کرن لئی تیار آں۔ اپنے اک انٹرویو وچ نعیم الحق نے آکھیا کہ سانوں یقین اے کہ نواز شریف عدالتوں نااہل ہو جان گے، جے نواز شریف نااہل ہوندے نیں تے نویں وزیر اعظم دے انتخاب لئی آئین وچ راہ موجود اے، اوہناں دا کہنا سی کہ پاکستان دیاں سیاسی پارٹیاں وچ بادشاہت اے جہدے اُتے اسیں یقین نہیں رکھدے۔ اوہناں دا ہور کہنا سی کہ سانوں ایہ وی یقین اے کہ وزیر اعظم دے نااہل ہون دے بعدنویں انتخابات وی ہو سکدے نیں۔