اسلام آباد(پاکستان پوائنٹ نیوز04۔نومبر۔2016ء) سپریم کورٹ وچ وزیر اعظم نواز شریف دے اختیاراں بارے حکومت دی نظر ثانی درخاست اُتے سنوائی ہوئی، جہنوں سپریم کورٹ نے رَد کر دِتا۔ تفصیل دے مطابق سپریم کورٹ نے وفاقی کابینا نوں بائی پاس کرن دے وزیر اعظم دے اختیار نوں کالعدم کرن خلاف حکومت دی نظرثانی درخاست اُتے سنوائی کیتی، سپریم کورٹ وچ درخاست اُتے سنوائی جسٹس ثاقب نثار دی سربراہی وچ تن رکنی بنچ نے کیتی۔
اٹارنی جنرل پاکستان نے حکومتی اپیل اُتے دلائل دیندے ہوئے آکھیا کہ حکومتی امور لئی مضبوط وزیر اعظم دی لوڑ اے۔ جہدے اُتے جسٹس ثاقب نثار نے ریمارکس دِتے کہ آئین وچ وزیراعظم دی سولو فلائٹ دی گنجائش نہیں، اوہناں نے آکھیا کہ وزیر اعظم نواز شریف چیف ایگزیکٹو تے ہو سکدے نیں پر حکومت نہیں، پر استثنا تے لیوی ٹیکس دا نفاذ وفاقی حکومت دا اختیار اے، آئین وچ کِدھرے وچ نہیں لکھیا کہ وزیر اعظم یاں کوئی وزیر و مشیر کَلا وفاقی حکومت اے، عدالت دا کہنا سی کہ اصول کدی وی آئین توں اُتانہ نہیں ہو سکدے۔
جسٹس ثاقب نثار نے سوال کیتا کہ کیہ وزیر اعظم کابینا دی منظوری دے بغیر جو چاہن کر سکدے نیں؟ اٹارنی جنرل نے آکھیا کہ ہر وفاقی وزیر وفاقی حکومت اکھوائے گا، ایہدے اُتے جسٹس ثاقت نثار نے آکھیا کہ آئین وچ وفاقی حکومت دی تعریف بیان نہیں کیتی گئی وفاقی حکومت کابینا دے مجموعے نوں آکھیا جاندا اے۔ جہدے بعد وزیر اعظم نواز شریف ولوں کابینا نوں بائی پاس کرن دے معاملے اُتے سپریم کورٹ نے حکومت ولوں دائر کیتی گئی نظرثانی درخاست رَد کر دِتی۔
