لاہور(پاکستان پوائنٹ نیوز04۔نومبر۔2016ء) نیشنل ایروناٹکس اینڈ سپیس ایڈمنسٹریشن (ناسا) دا کہنا اے کہ لاہور وچ آن والا سموگ اصل وچ نویں دِلی وچ فصلاں دے سڑن دا نتیجا اے۔ تفصیل دے مطابق پاکستان دے شہر لاہور وچ پچھلے کُجھ دِناں توں سموگ دا راج اے، جہدی وجہ توں لاہور واسی اکھاں وچ جلن تے ساہ لین وچ اوکڑاں ورگے روگاں دا شکار ہو رہے نیں۔ نیویارک ٹائمز وچ چھپن والی اک رپورٹ وچ دسیا گیا اے کہ بھارت وچ کساناں ولوں چاﺅلاں دی کاشت دے بعد بچ جان والی بوٹی نوں ساڑنا وی پاکستانی صوبے پنجاب وچ سموگ دی اک وڈی وجہ ہو سکدا اے۔
پچھلے سال ایس سلسلے وچ بھارتی ماحولیاتی عدالت وچ نیشنل گرین ٹربیونل نے استدعا کیتی سی کہ کساناں نوں چاﺅلاں دے تیلے ساڑن توں روکیا جائے۔ ایتھے ایہ گل وی ذکر جوگ اے کہ ہر سال بھارت وچ کساناں ولوں اک اندازے دے مطابق 32ملین ٹن تیلے ساڑے جاندے نیں جو کہ لاہور وچ سموگ دی اک ممکنا وجہ ہو سکدی اے۔
