اسلام آباد(پاکستان پوائنٹ نیوز03۔نومبر۔2016ء) وفاقی وزیر ریلوے خواجا سعد رفیق دا کہنا اے کہ ٹرین حادثا پِچھوں آن والی گڈی دے ڈرائیور تے اسسٹنٹ ڈائریکٹر دی لاپرواہی پاروں ہویا، سعد رفیق دا کہنا سی کہ ایہ دوویںاجے تیکر غائب نیں۔ ٹرین حادثے دے بعد ریلیف آپریشن مکمل کر لیا اے تے میں آپ ایس آپریشن دی نگرانی کر رہیا واں۔ اک ٹریک بحال ہو گیا اے دوجا وی جلدی بحال ہو جاوے گا۔
اوہناں نے آکھیا کہ بعض حکام دی غیر ذمے واری پاروں ایہ حادثا ہویا، ذمے واراں خلاف سخت کارروائی کیتی جاوے گی جدکہ حادثے وچ زخمی ہون والے تے ہلاک ہون والیاں دے گھر والیاں نوں مالی امداد دِتی جاوے گی۔ خواجا سعد رفیق دا کہنا سی کہ میں کراچی پہنچ کے آپ وی صورتحال دا جائزا لواں گا۔ یاد رہوے کہ اج سویرے لانڈھی دے نیڑے ٹرین حادثا ہویا جہدے نتیجے وچ ہن تیکر دی اطلاع مطابق 20 بندے ہلاک جدکہ 60 توں ودھ زخمی ہوئے۔
