وزیراعظم دا احتساب شروع ہو گیا اے، شریف خاندان اجے وی ویلا منگ رہیا اے: عمران خان

وزیراعظم دا احتساب شروع ہو گیا اے، شریف خاندان اجے وی ویلا منگ رہیا اے: عمران خان

اسلام آباد(پاکستان پوائنٹ نیوز03۔نومبر۔2016ء) پی ٹی آئی چیئرمین عمران خان نے سپریم کورٹ دے باہر میڈیا نال گل بات کردے ہوئے آکھیا کہ مینوں اج سپریم کورٹ وچ آ کے خشی ہورہی اے، اوہناں نے آکھیا کہ پچھلے 7مہیناں توں پاناما لیکس اُتے گل ہو رہی اے پر شریف خاندان نے اج عدالت وچ ہور ویلا منگ لیا اے۔ عمران خان دا کہنا سی کہ نواز شریف نے اپنا جواب تے جمع کروا دِتا پر اوہناں دے تن بالاں دا جواب جمع نہیں کروایا گیا، نواز شریف دے تِناں بالاں دا جواب جمع ہووے گا تے فیر ای کیس نواز شریف اُتے آوے گا۔

عمران خان دا کہنا سی کہ نواز شریف نے آکھیا کہ میں اپنے آپ نوں احتساب لئی پیش کرنا واں جدکہ اوہناںد ے وفاقی وزیراں نے آکھیا سی کہ اسیں درخاست نوں چیلنج نہیں کراں گے، پر اٹارنی جنرل دے ذریعے اوہناں نے سنوائی نوں چیلنج کیتا۔ عمران خان دا کہنا سی کہ میں اٹارنی جنرل توں پِچھنا واں کہ تُسیں لوکائی دے ملازم او تے تُسیں کیویں شریف خاندان دا کیس لڑ رہے او۔ اوہناں دا کہنا سی کہ اٹارنی جنرل لوکائی دے ٹیکس اُتے کم کردا اے، ایہ شریف خاندان دا ملازم نہیںا ے۔ اوہناں نے ہور آکھیا کہ مینوں اج سپریم کورٹ وچ آ کے خشی ہوئی ۔ عدالت نے فیصلا کیتا اے کہ ایہ ساریاں درخاستاں سنوائی جوگ نیں۔