لاہور(پاکستان پوائنٹ نیوز31۔اکتوبر۔2016ء) ایڈوائزر چیئرمین تحریک انصاف ڈاکٹر یاسمین راشد نے آکھیا اے کہ شریف نوں شریف نہ بچائے تے شریف نہیں بَچدا، لوکائی راتاں دے رابطیاں تے کرپشن دے ضابطے منن توں انکار چکی اے۔ نواز شریف پاک فوج نوں وی پنجاب پولیس بنانا چاہندے نیں۔ جمہوریت نوں خطرا احتجاج توں نہیں نواز توں اے۔ ملکی مفادات تے عوامی حقاں لئی وڈی توں وڈی قربانی دے سکدے آں۔
ایہناں خیالاں دا اظہار اوہناں نے حکومت ولوں کارکناں نوں ہراساں کرن، گرفتاریاں تے کریک ڈاﺅن دے بعد اپنے دفتر وچ 2نومبر نوں اسلام آباد روانگی دے سلسلے وچ منعقد کیتی گئی میٹنگ تے میڈیا دے نمائندیاں نال گل بات کردے ہوئے کیتا۔ ایڈوئزر چیئرمین تحریک انصاف ڈاکٹر یاسمین راشد نے آکھیا اے کہ میاں صاحب دی تلاشی نہ دین پاروں ملک اج نازک ترین دور توں لنگھ رہیا اے،ایس لئی جمہوریت نوں اصل خطرا احتجاج توں نہیں بلکہ نواز شریف توں اے۔
اوہناں نے آکھیا کہ نواز شریف پاک فوج نوں وی پنجاب پولیس بنانا چاہندے نیں ۔اوہناں دا کہنا سی کہ لوکائی باشعور ہو گئی اے ہن اوہ راتاں دے رابطیاں دے ضابطے منن توں انکاری ہو چکی اے تے تحریک انصاف لوکائی دے دل دی آواز سُندے ہوئے ملکی مفادات تے عوامی حقاں لئی وڈی توں وڈی قربانی دے سکدی اے۔
