خیبرپختونخوا توں بنی گالا آن والے تحریک انصاف دے کارکناں نوں روکن لئی پشاور موٹر وے تے جی ٹی روڑاُتے سکیورٹی ہور سخت، جی ٹی روڈ نوں کنٹینر لا کے بند کر دِتا گیا

اسلام آباد(پاکستان پوائنٹ نیوز31۔اکتوبر۔2016ء) خیبر پختونخوا توں بنی گالا آن والے تحریک انصاف دے کارکناں نوںر وکن لئی پشاور موٹروے تے جی ٹی روڈ اُتے سکیورٹی ہور سخت کر دِتی گئی۔ خیبر پختونخوا دے وزیر اعلا پرویز خٹک نے پرچا کاراں نال گل بات کردے ہوئے آکھیا کہ بنی گالا تیکر پہنچن لئی کارکن ساریاں رکاوٹاں تے بیریئرز ہٹا دین گے۔ اوہناں نے آکھیا کہ جے کُجھ وی ہویا، ساڈے کسے کارکن نوں اک خراش وی آئی تے اسیں عدالت جاواں گے تے ایہدی ساری ذمے واری وزیراعظم نواز شریف تے وزیر اعلا پنجاب شہباز شریف دی ہووے گی۔

یاد رہوے کہ پی ٹی آئی دے چیئرمین عمران خان نے پچھلے دیہاڑے سارے کارکناں نوں آکھیا سی کہ اوہ ساریاں اوکڑاں ہٹا کے بنی گالا پہنچن جہدے بعد وزیر وزیر اعلا خیبر پختونخوا پرویز خٹک دی قیادت وچ کے پی کے توں کارکن اسلام آباد آ رہے نیں۔ جی ٹی روڈ نوں کنٹینرز لا کے بند کر دِتا گیا اے جدکہ پولیس تے ایف سی دے اہلکار وی تعینات نیں جہناں کول ڈنڈے تے اتھر گیس دے شیل موجود نیں۔

ایہدے علاوا خیبر پختونخوا آن والے پی ٹی آئی دے قافلے وچ دو کریناں وی موجود نیں جو راہ وچ آن والیاں ساریاں رکاوٹاں نوں ہٹان لئی ورتیاں جا سکدیاں نیں۔ کارکن اسلام آباد پہنچن توں روکن لئی پشاور موٹروے اُتے رکاوٹاں دیاں تن صفاں بنائیاں گئیاں نیں۔ ایس توں وکھ بنی گالا دے نیڑے مری روڈ اُتے وی پولیس نے ناکا بندی کیتی ہوئی اے تاں جے اسلام آباد وچ موجود کارکن عمران خان دے گھر تیکر نہ پہنچ سکن۔