اسلام آباد(پاکستان پوائنٹ نیوز31۔اکتوبر۔2016ء) پاکستان تحریک انصاف دے سینئر رہنما شاہ محمود قریشی نے چیئرمین عمران خان پِچھے اسٹیبلشمنٹ یاں کسے دوجی طاقت دے کردار بارے خبراں نوں رَد کرد ہوئے ایس طرحاں دیاں خبراں نوں پروپیگنڈا قرار دے دِتا۔تفصیل دے مطابق نجی ٹی وی دے پروگرام وچ گل بات کرد ے ہوئے شاہ محمود قریشی دا کہنا سی کہ ایس طرحاں دے پروپیگنڈے 2014 دے دھرنے دوران وی کیتے گئے جوکہ جھوٹھ ثابت ہوئے تے اج وی اوہی جماعتاں ایس کم وچ ملوث نیں ۔
اوہناں نے آکھیا کہ تحریک انصاف جمہوریت دے حق وچ اے تے اسیں آئین نوں مَندے آں، ایس لئی اسیں جس طاقت اُتے بھروسا کردے آں اوہ اللہ تے لوکائی دی طاقت اے۔ عمران خان ولوں پچھلے دِنا تیجی طاقت دے اقتدار وچ آن دے اشارے اُتے گل بات کردے ہوئے اوہناں دا کہنا سی کہ ایہدی بنیادی وجہ ایہ اے کہ حکومت انج دے اقدامات کر رہی اے جو جمہوریت وچ نہیں کیتے جاندے۔
پی ٹی آئی رہنما دا کہنا سی کہ راہ بند کرکے تے کنٹینر لا کے ٹکراﺅ دی کیفیت حکومت نے آپ پیدا کیتی اے۔ اک سوال دے جواب وچ اوہناں نے آکھیا کہ حکومت نال کوئی رابطا نہیںا ے، کیوں جے رابطا تے اوتھے ہوندا اے جتھے دو جماعتاں وچکار مُک مُکا ہووے جدکہ تحریک انصاف مک مکا والی جماعت نہیں اے۔ اوہناں دا کہنا سی کہ جے حکومت نے رابطا کیتا تے اسیں اوہی شرطاں پیش کراں گے، جہناں وچ پہلی تے بنیادی شرط پاناما لیکس دے حوالے نال اپوزیشن دا ٹرمز آف ریفرنس (ٹی او آرز) بل اے جہنوں پارلیمنٹ توں منظور کر کے ایہدے اُتے اک تحقیقاتی کمیشن بنادِتا جائے۔شاہ محمود قریشی دا ہور کہنا سی کہ عدالت جان دے نال نال احتجاج دی صورت وچ لوکائی نال رابطا کرنا ساڈا آئینی حق اے جہنوں کوئی نہیں کُھوہ سکدا۔
