لاہور(پاکستان پوائنٹ نیوز03۔دسمبر۔2018ء) صوبائی راجدھانی وچ بغیر ہیلمٹ موٹر سائیکل سوار رُل گئے، پٹرول پمپ مالکاں نے بغیر ہیلمٹ پٹرول دین توں انکار کر دتا، ضلعی حکومت نے پٹرول پمپ مالکاں نوں بغیر ہیلمٹ پٹرول نہ دین دا حکم جاری کیتا سی۔ میڈیا رپورٹس دے مطابق لاہور وچ ڈیفنس فیز ون تے فیز ٹو سنے مال روڈاُتے پٹرول پمپ مالکاں نے بغیر ہیلمٹ موٹر سائیکل سواراں نوں پٹرول دینا بند کر دتا اے۔
جیہدے اُتے موٹر سائیکل سوار شہری تے اوہناں نال سوانیاں تے بال رُل گئے نیں ۔ شہریاں نے گِلا کیتا کہ پٹرول پوائیے یاں پہلے ہیلمٹ لے کے آئیے۔ شہریاں نے عدالت توں اپیل کیتی اے کہ سوانیاں دے ہیلمٹ پان توں پابندی چُکی جائے۔ جدکہ مارکیٹ وچ اجے تیکر سوانیاں لئی ہیلمٹ نہیں نیں۔ اک شہری دا آکھنا سی کہ گھر وچ جے تن سوانیاں نیں تے اوہناں دے سِراں دے سائز وکھو وکھ نیں تے کیہ اسیں تن ہیلمٹ لئیے؟دوجے پاسے ضلعی حکومت لاہور نے حکم جاری کیتا اے کہ جے کوئی موٹر سائیکل سوار ہیلمٹ نہ پائے تے اوہنوں پٹرول پمپ مالک پٹرول نہ دیوے۔ جیہدے مگروں پہلی دسمبر توں پٹرول پمپ مالکاں نے شہریاں نوں ہیلمٹ دے بغیر پٹرول دین توں انکا رکر دتا اے۔
