لاہور(پاکستان پوائنٹ نیوز19۔نومبر۔2018ء) سمارٹ فونز دی ورتوں عام ہون مگروں سمارٹ فونز ورتن والیاں ولوں سوشل میڈیا دا استعمال وی بہت ودھ گیا اے۔ سوشل میڈیا اُتے دنیا بھر دے لوک اک دوجے نال صرف اک بٹن دبھ کے ای رابطہ کر لیندے نیں۔ سوشل میڈیا دی وجہ توں جتھے دنیا وچ ہزاراں میل دور بیٹھے لوک دوست بنے اوتھے کُجھ لوکاں نوں ای سوشل میڈیا راہیں اپنی محبت وی مل گئی۔
کُجھ دن پہلاں ای امریکی سوانی پاکستانی مُنڈے دی محبت وچ گرفتار ہو کے سیالکوٹ اپڑ ی سی پر ہن اک ہور امریکی کُڑی لاہوری مُنڈے دی محبت وچ گرفتار ہو کے پاکستان اپڑ گئی اے۔ تفصیل مطابق 23ورھیاں دے محسن تے 19ورھیاں دی ماریہ انیلا دی سوشل میڈیا سائٹ انسٹا گرام اُتے دوستی ہوئی جوہولی ہولی محبت وچ بدل گئی۔ محسن دی محبت وچ گرفتار ہو کے 19ورھیاں دی ماریہ ہزاراں میل دا پندھ کر کے لاہور اپڑ گئی اے۔
محسن نے دسیا کہ اک دو دن اسیں اک دوجے نوں ہیلو ہائے کیتا۔ ساڈی آپس وچ گل بات ہوندی رہی ۔ کُجھ دن بعد میں ماریہ نوں پرپوز کیتا۔ میں آکھیا کہ میں تہانوں پسند کرنا واں تے تہاڈے نال ویاہ کرنا چاہنا واں۔ جیہدے اُتے ماریہ نے مثبت جواب دِتا تے ویاہ لئی راضی ہو گئی۔ایس موقعے تے ماریہ دا آکھنا سی کہ ساڈی سوشل میڈیا اُتے گل ہوئی جیہدے مگروں فون کالز دا سلسلا شروع ہویا تے ایہناں نے مینوں ویاہ دی آفر کیتی۔ ماریہ دا آکھنا سی کہ میں ایس ویاہ توں بہت خش آں تے چھیتی ای محسن نوں امریکا لیجنا چاہنی آں۔
