اسلام آباد(پاکستان پوائنٹ نیوز16۔نومبر۔2018ء) چیف جسٹس آف پاکستان جسٹس ثاقب نثار نے چیف جسٹس دا عہدہ سنبھالدے ای اپنی کارکردگی نال لوکاں وچ اپنا مقام بنایاتے گھٹ ویلے وچ ای مشہور ہوگئے۔ ایہو وجہ سی کہ لوکائی انصاف لئی چیف جسٹس ثاقب نثار توں اپیل کرن لگی جدکہ جسٹس ثاقب نثار نے وی لوکائی نوں انصاف دوان تے اوہناں دی فریاد سُنن دی آخری حد تیکر کوشش کیتی۔
چیف جسٹس آف پاکستان جسٹس ثاقب نثار آؤندے ویلے 17جنوری 2019نوں (ر) ہو رہے نیں۔ جیہدے مگروں سپریم کورٹ دے 8سینئر ججاں نوں ترتیب وار سنبھالن دا موقع ملے گا۔ایہناں ججاں وچ جسٹس آصف سعید خان کھوسہ، جسٹس گلزار احمد، جسٹس عمر عطا بندیال، جسٹس قاضی فائز عیسی، جسٹس اعجاز الاحسن، جسٹس سید منصور علی شاہ، جسٹس منیب اختر تے جسٹس یحیی آفریدی شامل نیں۔
چیف جسٹس دی ریٹائرمنٹ مگروں سینئر ترین جج نوں چیف جسٹس دا عہدہ ملے گا۔ 18جنوری 2019نوں جسٹس آصف سعید کھوسہ چیف جسٹس آف پاکستان دا عہدہ سنبھالن گے، جسٹس آصف سعید خان کھوسہ 20دسمبر 2019نوں ریٹائر ہو جان گے۔ جیہدے مگروں جسٹس گلزار احمد چیف جسٹس دے عہدے اُتے آ جان گے۔ جسٹس گلزار احمد پہلی فروری 2022نوں (ر) ہون گے۔ 2فروری 2022نوں جسٹس عمر عطا بندیال چیف جسٹس دا عہدہ سنبھالن گے۔جسٹس عمر عطا بندیال 16دسمبر 2023تیکر عہدے اُتے رہن گے۔ ایہناں 8ججاں وچوں کُجھ جج ایس عہدے اُتے اپڑن توں پہلاں ای (ر) وی ہو جان گے کیونکہ آئین دے مطابق کورٹ دے جج دی ریٹائرمنٹ دی عمر 65سال متھی گئی اے۔
