اسلام آباد(پاکستان پوائنٹ نیوز15۔نومبر۔2018ء) وفاقی وزیر فواد چودھری دے سینیٹ وچ داخلے اُتے پابندی لا دتی گئی اے۔ میڈیا رپورٹس مطابق چیئرمین سینیٹ نے وفاقی وزیر اطلاعات فواد چودھری دی سینیٹ داخلے اُتے پابندی دی رولنگ جاری کر دتی ۔ چیئرمین سینیٹ صادق سنجرانی نے رولنگ دیندے ہوئے آکھیا کہ وزیر اطلاعات فواد چودھری نوں ایوان وچ آکے معافی منگنی چاہیدی۔
معافی منگن تیکر فواد چودھری دے چالو(رواں)اجلاس وچ رلت کرن اُتے پابندی ہوئے گی۔ ایوان بالا اُچیاں ریتاں دا حامل رہیا اے تے آؤندے ویلے نوں وی رہوے گا۔ ایوان وچ کُجھ چِر توں بدمزدگی پیدا ہو رہی اے۔ چیئرمین سینیٹ نے اپنی رولنگ وچ ہور آکھیا کہ لازمی اے کہ ایس طرحاں دیاں گلاں تے رویاں توں احتیاط کرو۔ ہاؤس نوں چنگے طریقے نال چلان وچ حکومت دی بُہتی ذمے واری اے۔
کسے ممبر نوں انج دے لفظاں یاں اشاریاں دا استعمال نہیں کرنا چاہیدا جیہدے نال ایوان دا تقدس مجروح ہوئے۔ اوہناں دا آکھنا سی کہ وزیر اطلاعات خلاف قوائد(3)13تے رول 264دے تحت کارروائی کیتی جا رہی اے۔ فواد چودھری جاری باقی سیشنز وچ رلتی نہیں ہو سکدے۔ چیئرمین سینیٹ صادق سنجرانی نے آکھیا اے کہ سینیٹ وچ بدمزدگی پیدا ہونا شروع ہوئی اے۔ ساڈے ساریاں اُتے لازم اے کہ احتیاط کرئیے۔ جمعرات نوں چیئرمین سینیٹ نے وفاقی وزیر اطلاعات نوں معافی منگن دی ہدایت کردے ہوئے آکھیا کہ فواد چودھری ایوان وچ آکے معافی منگن، جے معافی نہیں منگن گے تے اوہناں اُتے جاری اجلاس وچ داخلے اُتے پابندی لانا واں۔
