سیالکوٹ(پاکستان پوائنٹ نیوز13۔نومبر۔2018ء) پچھلے دیہاڑے اک دلچسپ واقعہ اودوں ساہمنے آیا جدوں اک عاشق اپنی محبوبہ نوں بھیس وٹا کے ملن لئی گیا پر پھڑیا گیا، میڈیا اُتے خبر ساہمنے آن مگروں ہن عاشق نوں خاندان وچ بے عزتی دی فکر ستان لگی۔ تفصیل مطابق اج کل عاشق ، معشوق نال رابطہ کرن لئی موبائل دا سہارا لیندے نیں تے جے محبوبہ کول موبائل دی سہولت نہ ہوئے تے اوہنوں آپ ایہ سہولت دیندے نیں ۔
جے ایہدے نال وی دل نوں چین نہ ملے تے محبوبہ نوں ملن چلے جاندے نیں۔ اجیہا ای اک واقعہ سیالکوٹ وچ ساہمنے آیا،جتھے عاشق برقع پاکے محبوبہ نوں ملن ہسپتال اپڑیا تے مشکوک چال چلن ویکھ کے کُڑی والیاں نے پھڑ لیا۔ برقعے وچ مرد نکلن اُتے ہسپتال سکیورٹی والے گھبرا گئے تے پولیس نوں سد لیا۔ پولیس نے اپنے روایتی انداز وچ محبت بھری چھترول کیتی تے عاشق نوں عشق معشوقی سبھ بُھل گیا۔
عاشق نے پولیس نوں دسیا کہ اوہ اپنی بیگم نوں ملن گیا ، جدوں پولیس نے آکھیا کہ بیگم نوں ملن لئی برقعے دی کیہ لوڑ سی تے نوجوان نے معصوم انداز وچ آکھیا کہ اوہدے ماں پیو نہیں راضی۔ نوجوان نے ہور دسیا کہ اجے ویاہ نہیں ہویا بلکہ ویاہ ہون والا اے۔ پر ہن عاشق دا آکھنا اے کہ محبوبہ بیمار سی تے میں دل ہتھوں مجبور سی۔ محبوبہ نال ملن دا کوئی ہور طریقہ نہیں سی، ایس لئی برقع پا کے اوہنوں ملن چلا گیا پر ہن میں بہت شرمندہ آں کہ خاندان وچ جو وی ویکھے گا تے میری بے عزتی کرے گا۔
