اسلام آباد(پاکستان پوائنٹ نیوز10۔نومبر۔2018ء) پاکستان تحریک انصاف دے رکن قومی اسمبلی و وزیر مملکت مراد سعید نوں قومی اسمبلی وچ اوہناں دیاں جوشیلیاں تقریراں دی وجہ توں جانیا جاندا اے۔ مراد سعید نے کُجھ دن پہلاں ای قومی اسمبلی دے ہون والے اجلاساں وچ سابق حکومت نوں تنقید دا نشانہ بنایا،جیہدے اُتے اوہناں دی واہ واہ وی ہوئی۔ پر قومی اسمبلی وچ گرجن والے مراد سعید باندراں کولوں ڈر گئے۔
ہویا کُجھ انج کہ مراد سعید نوں کوٹھے اُتے کسے شے دی موجودگی دا احساس ہویا ، جیہدے اُتے اوہناں نے چھیتی نال پولیس نال رابطہ کیتا تے اوہناں نوں دسیا کہ میرے گھر وچ کُجھ نامعلوم بندے وڑ گئے نیں، تُسیں چھیتی نال آؤ۔ پولیس مراد سعید دے گھر اپڑی تے ویکھیا کہ مراد سعید دے گھر دے کوٹھے اُتے باندر موجود سن ، جیہناں دی وجہ توں مراد سعید ڈر گئے تے پولیس نوں سد لیا۔ مراد سعید دی ایہ خبر ساہمنے آن مگروں سوشل میڈیا ورتیندڑاں ولوں اوہناں دا مذاق اُڈایا جا رہیا اے تے آکھیا جا رہیا اے کہ اک پاسے ایس ملک دے وزیر اعظم عمران خان نیں جو زلزلا آن مگروں وی کابینہ دا اجلاس چھڈ کے باہر نہیں گئے سن تے دوجے پاسے مراد سعید کوٹھے اُتے آن والے باندراں کولوں ڈر گئے۔
