لاہور(پاکستان پوائنٹ نیوز05۔نومبر۔2018ء) پاکستان ٹیلی ویژن انتظامیہ نے وزیراعظم عمران خان دی تقریر دوران بیجنگ نوں ’بیگنگ‘ لکھن اُتے 3سینئر افسراں نوں معطل کر دتا اے، وزیر اعظم چین وچ پچھلے دیہاڑے اک تقریب نال خطاب کر رہے سن کہ اوہناں دے لائیو خطاب دوران سرکاری ٹی وی نے چینی راجدھانی دا ناں بیجنگ دی تھاں ’بیگنگ‘ لکھ دتا، جیہدے اُتے سوشل میڈیا ورتیندڑاں نے تنقید کیتی۔
میڈیا رپورٹس مطابق پی ٹی وی انتظامیہ نے اپنے ٹویٹ وچ لکھیا کہ وزیر اعظم عمران خان دی تقریر دوران ٹائپنگ دی غلطی ہوئی سی۔ جیہدی وجہ توں وزیر اعظم دی لائیو تقریر دوران شہر دا ناں غلط لکھیا گیا سی۔ ٹائپنگ دوران شہر دا ناں بیجنگ دی تھاں بیگنگ لکھیا گیا۔ جیہنوں وزیر اعظم دی تقریر دے 22سکینڈاں وچ ٹھیک کر دتا گیا سی۔ پر ہن پی ٹی وی انتظامیہ نے غلطی کرن والے ملازماں خلاف ایکشن لیندے ہوئے اوہناں نوں معطل کر دتا اے۔وسیلیاں مطابق برطرف ملازماں وچ ڈائریکٹر نیوز، ڈائریکٹر آئی ٹی تے ڈائریکٹر کرنٹ افیئرز شامل نیں۔
