اسلام آباد(پاکستان پوائنٹ نیوز01۔نومبر۔2018ء) پاناما جے آئی ٹی دے سربراہ و نیب دے گواہ واجد ضیاء نے آکھیا اے کہ نواز شریف دی فلیگ شپ وچ سرمایہ کاری دا کوئی ثبوت نہیں لبھیا۔تفصیل مطابق اسلام آبا د دی احتساب عدالت وچ فلیگ شپ ریفرنس دی سنوائی ہوئی۔ سنوائی دوران نواز شریف دے وکیل خواجا حارث نے پاناما جے آئی ٹی دے سربراہ و نیب دے گواہ واجد ضیاء اُتے جرح کیتی۔
خواجا حارث نے پُچھیا کہ کیہ جے آئی ٹی نوں کوئی انج دی دستاویز یاں اجیہا اکاؤنٹ ملیا جیہدے توں لگدا ہوئے کہ نواز شریف نے فلیگ شپ انوسٹمنٹ لمیٹڈ دے قیام وچ سرمایہ کاری کیتی ہوئے، یاں اوہدے قیام لئی پیسے منتقل کیتے ہون۔جواب وچ واجد ضیاء نے آکھیا کہ انج دی کوئی دستاویز یاں بنک اکاؤنٹ نہیں لبھیا۔ واجد ضیاء نے آکھیا کہ جے آئی ٹی نوں نواز شریف دا کوئی اجیہا باہرلے ملک بنک اکاؤنٹ نہیں ملیا جیہدے توں فلیگ شپ انوسٹمنٹ لمیٹڈ دے قیام لئی پیسے منتقل کیتے گئے ہون۔
جے آئی ٹی نے کسے انج دے گواہ دا بیان ریکارڈ نہیں کیتا ، جیہنے آکھیا ہوئے کہ نواز شریف نے فلیگ شپ انوسٹمنٹ دے قیام وچ مدد کیتی ہوئے یاں اوہدے لئی پیسے منتقل کیتے ہون۔ ایس موقعے اُتے واجد ضیاء نے ہور آکھیا کہ نواز شریف دے باہرلے ملک اکاؤنٹس دیاں کوئی تفصیلاں نہیں لبھیاں، کیونکہ جے آئی ٹی نے اوہناں دے باہرلے ملک اکاؤنٹس دیاں تفصیلاں معلوم ای نہیں کیتیاں۔حسین نواز نے وی جے آئی ٹی ساہمنے اپنے بیان وچ ایہ نہیں آکھیا کہ اوہناں دے والد نواز شریف نے کمپنیاں دے قیام لئی پیسے دتے ۔
